Suratમાં DyCM હર્ષ સંઘવીનો નાગરિકો સાથે સીધો સંવાદ: મજુરા વોર્ડના પ્રશ્નો સાંભળી નિકાલ માટે આપી ખાતરી

સુરત મ્યુનિસિપલ કોર્પોરેશનના મજુરા વિસ્તારમાં સ્થાનિક રજૂઆતો અને લોકપ્રશ્નોના ત્વરિત ઉકેલ માટે એક મહત્વપૂર્ણ બેઠક યોજાઈ ગઈ. ગુજરાતના ગૃહ રાજ્ય મંત્રી હર્ષ સંઘવીએ પોતાના મતવિસ્તાર એવા મજુરાના વોર્ડ નંબર ૨૩ ના સ્થાનિક નાગરિકો અને સોસાયટીના અગ્રણીઓ સાથે સીધો સંવાદ સાધ્યો હતો. વહીવટી તંત્ર અને જનતા વચ્ચેના સેતુ સમાન આ લોકદરબારમાં મંત્રીએ લોકોની વચ્ચે બેસીને તેમના પાયાના પ્રશ્નો ખૂબ જ ગંભીરતાપૂર્વક સાંભળ્યા હતા.

ચોમાસાની પૂર્વતૈયારીઓ પર વિશેષ ભાર

આ લોક સંવાદ કાર્યક્રમમાં આગામી ચોમાસાની ઋતુને ધ્યાનમાં રાખીને વિસ્તારમાં થઈ રહેલી પ્રિ-મોન્સૂન કામગીરીની સર્વગ્રાહી સમીક્ષા કરવામાં આવી હતી. ચોમાસા દરમિયાન નાગરિકોને પાણી ભરાવાની કે અન્ય કોઈ મુશ્કેલી ન પડે તે માટે ડ્રેનેજ લાઈનોની સફાઈ, રોડ-રસ્તાનું સમારકામ અને સ્ટ્રોમ વોટર લાઈનની સ્થિતિ અંગે વિસ્તૃત ચર્ચા થઈ હતી. મંત્રીએ સ્થાનિક રહીશો પાસેથી તેમની સોસાયટીઓમાં વર્ષોથી નડતી ચોમાસા આધારિત સમસ્યાઓનું ગ્રાઉન્ડ રિપોર્ટિંગ મેળવ્યું હતું.

સ્થાનિક પ્રશ્નોના કાયમી નિવારણ માટે તંત્રને આદેશ

હર્ષ સંઘવીએ માત્ર રજૂઆતો સાંભળી જ નહોતી, પરંતુ સ્થળ પર જ ઉપસ્થિત મહાનગરપાલિકાના અધિકારીઓ સાથે ચર્ચા કરી સમસ્યાઓના કાયમી અને ટેકનિકલ ઉકેલ લાવવા માટે જરૂરી દિશાનિર્દેશો આપ્યા હતા. પીવાના પાણી, સફાઈ, સ્ટ્રીટ લાઈટ અને ટ્રાફિક જેવા રોજિંદા પ્રશ્નો અંગે પણ નાગરિકો સાથે ખુલ્લા મને ચર્ચા કરવામાં આવી હતી. લોકપ્રિય નેતાને પોતાની વચ્ચે જોઈને અને પ્રશ્નોના સકારાત્મક ઉકેલની ખાતરી મળતા મજુરા વોર્ડના નાગરિકોએ વહીવટી સજાગતા બદલ હર્ષ સંઘવીનો આભાર વ્યક્ત કર્યો હતો.

ગુજરાતના વધુ સમાચાર વાંચવા માટે ક્લિક કરો