Surat News : સુરત કોર્ટનો મોટો નિર્ણય, શિક્ષક આપઘાત કેસમાં આરોપીઓના રિમાન્ડ મંજૂર

સુરતના અથવાલાઈન્સ વિસ્તારમાં બનેલી અત્યંત કરુણ ઘટનામાં શિક્ષક અલ્પેશ મકવાણાએ પોતાના બે બાળકોને ઝેર આપીને તેમની હત્યા કર્યા બાદ પોતે આપઘાત કરી લીધો હતો. આ ઘટના પાછળના કારણોનો ખુલાસો થતાં પોલીસે મૃતકની પત્ની ફાલ્ગુની સોલંકી અને તેના પ્રેમી નરેશ રાઠોડની ધરપકડ કરી છે. આ બંને આરોપીઓને આજે સુરત કોર્ટમાં રજૂ કરવામાં આવ્યા હતા, જ્યાં કોર્ટે તેમના ત્રણ દિવસના રિમાન્ડ મંજૂર કર્યા છે.

સુસાઈડ નોટ અને ડાયરીમાંથી ખુલ્યું રહસ્ય

આ કેસની તપાસ કરી રહેલી ઉમરા પોલીસને મૃતક અલ્પેશ મકવાણાની એક સુસાઈડ નોટ અને અંગત ડાયરી મળી હતી. આ દસ્તાવેજોમાં અલ્પેશે સ્પષ્ટપણે લખ્યું હતું કે, તેની પત્ની ફાલ્ગુનીના પ્રેમી નરેશ રાઠોડ સાથેના આડાસંબંધો અને તેના ત્રાસથી તે કંટાળી ગયો હતો. આ કારણે જ તેણે આ આત્યંતિક પગલું ભર્યું અને પોતાના નિર્દોષ બાળકોને પણ સાથે લઇ ગયો. આ સુસાઈડ નોટ અને ડાયરીના આધારે પોલીસે ફાલ્ગુની અને નરેશ સામે આત્મહત્યા માટે દુષ્પેરણાનો ગુનો દાખલ કર્યો હતો.

રિમાન્ડ દરમિયાન પોલીસની સઘન પૂછપરછ

પોલીસે કોર્ટમાં રજૂઆત કરી હતી કે, આ કેસમાં ઊંડાણપૂર્વક તપાસ કરવામાં માટે આરોપીઓના રિમાન્ડ જરૂરી છે. કોર્ટે પોલીસની રજૂઆતને માન્ય રાખીને બંને આરોપીઓના ત્રણ દિવસના રિમાન્ડ મંજૂર કર્યા છે. પોલીસ એ જાણવાનો પ્રયાસ કરશે કે, આ સમગ્ર ઘટનામાં તેમનો શું રોલ હતો. અલ્પેશને કઈ રીતે ત્રાસ આપવામાં આવતો હતો અને આ ગુના પાછળ કોઈ અન્ય કારણો છે કે કેમ. રિમાન્ડ દરમિયાન પોલીસ ફાલ્ગુની અને નરેશની કડક પૂછપરછ કરશે.