Kutchના રાપરના ત્રંબામાં યુવકની હત્યાનો ભેદ ઉકેલાયો, પ્રેમ સંબંધમાં હત્યા કરનાર આરોપીની પોલીસે કરી ધરપકડ

કચ્છ જિલ્લાના રાપર તાલુકાના ત્રંબા ગામમાં થોડા સમય પહેલા થયેલા યુવકની હત્યાના કેસનો ભેદ આખરે પોલીસે ઉકેલી નાખ્યો છે. પોલીસે આ હત્યાકાંડમાં સંડોવાયેલા આરોપીની ધરપકડ કરીને તેને સાથે રાખીને ઘટનાનું રિકન્સ્ટ્રક્શન કર્યું હતું. ત્રંબામાં ધનસુખ ડોડીયા નામના યુવકની હત્યા કરવામાં આવી હતી. આ ઘટનાની તપાસ દરમિયાન પોલીસે ચોંકાવનારી વિગતો મેળવી હતી. જેમાં જાણવા મળ્યું કે આ હત્યાનું મૂળ કારણ પ્રેમ સંબંધ હતું.

પ્રેમ સંબંધમાં ત્રંબામાં યુવકની થઈ હતી હત્યા

પોલીસે સઘન તપાસના આધારે હત્યા કરનાર આરોપીને ઝડપી પાડ્યો હતો. આરોપીની પૂછપરછમાં તેણે ગુનો કબૂલી લીધો હતો. વધુમાં ઘટના કઈ રીતે બની અને હત્યા કેવી રીતે કરવામાં આવી તે જાણવા માટે પોલીસે આરોપીને સાથે રાખીને બનાવ સ્થળ એટલે કે ત્રંબા ગામની મુલાકાત લીધી હતી. પોલીસે આરોપીની હાજરીમાં સમગ્ર ઘટનાનું રિકન્સ્ટ્રક્શન કર્યું હતું. જેથી હત્યાના દરેક પાસાને સ્પષ્ટ રીતે સમજી શકાય.

પોલીસ આરોપીને સાથે રાખીને ઘટનાસ્થળે પર પહોંચી

ઘટનાસ્થળે જ્યારે આરોપીને લઈ જવામાં આવ્યો. ત્યારે તે લંગડાતો ચાલતો જોવા મળ્યો હતો. કદાચ હત્યાના પ્રયાસ દરમિયાન અથવા હત્યા બાદ ભાગતી વખતે તેને ઈજા પહોંચી હોવાનું અનુમાન છે. પોલીસે હવે આ હત્યાના ગુનામાં કાયદેસરની કાર્યવાહી હાથ ધરી છે અને આરોપી સામે મજબૂત પુરાવા એકઠા કરવા માટે તપાસનો ધમધમાટ શરૂ કર્યો છે. પ્રેમ સંબંધમાં થયેલી આ હત્યાએ ત્રંબા ગામ અને રાપર પંથકમાં ચકચાર જગાવી છે.