Kutchના કંડલામાં ઓઈલ પાઈપલાઈન અને IFFCO પ્લાન્ટ નજીકનું ગેરકાયદે બાંધકામ જમીનદોસ્ત કરાયું

કચ્છ જિલ્લામાં સરકારી જમીનો અને સંવેદનશીલ વિસ્તારોમાં ખડકાયેલા ગેરકાયદેસર દબાણોને હટાવવા માટે વહીવટી તંત્ર દ્વારા શરૂ કરાયેલી કડક ઝુંબેશ હજુ પણ વણથંભી રહી છે. આ કડીમાં કંડલાના દરિયાકાંઠાના અને રાષ્ટ્રીય સુરક્ષાની દૃષ્ટિએ અત્યંત મહત્વપૂર્ણ ગણાતા વિસ્તારમાં તંત્ર દ્વારા એક મોટું ઓપરેશન હાથ ધરવામાં આવ્યું હતું. કંડલા મરીન પોલીસ સ્ટેશનની હદમાં આવતા અને ખાસ કરીને વ્યૂહાત્મક રીતે અતિ સંવેદનશીલ એવા ઓઈલ પાઈપલાઈન તથા ઇફ્કો (IFFCO) પ્લાન્ટ નજીકના વિસ્તારમાં ઉભા કરી દેવાયેલા ગેરકાયદેસર બાંધકામો સામે તંત્રએ રાતોરાત લાલ આંખ કરી હતી.

સુરક્ષા માટે જોખમી ગેરકાયદેસર મસ્જિદ પર ફર્યું બુલડોઝર

જે વિસ્તારમાં આ દબાણ હટાવવાની કામગીરી કરવામાં આવી તે ઓઈલ પાઈપલાઈન અને કેમિકલ પ્લાન્ટને કારણે ખુબ જ હાઈ-એલર્ટ ઝોન ગણાય છે. આ સુરક્ષા ક્ષેત્રની આસપાસ નિયમોનું સરેઆમ ઉલ્લંઘન કરીને એક ગેરકાયદેસર મસ્જિદનું બાંધકામ ઊભું કરી દેવામાં આવ્યું હતું. વહીવટી તંત્ર અને સ્થાનિક સત્તાવાળાઓએ આ બાબતની ગંભીરતા નોંધીને JCB અને બુલડોઝરો સાથે ઓપરેશન શરૂ કર્યું હતું. ચુસ્ત પોલીસ બંદોબસ્ત અને કડક સુરક્ષા કવચ વચ્ચે તંત્રએ આ ગેરકાયદેસર મસ્જિદના બાંધકામને તોડી પાડીને જમીનદોસ્ત કરી દીધું હતું અને સમગ્ર સરકારી જમીનને દબાણમુક્ત કરાવી હતી.

ચુસ્ત પોલીસ બંદોબસ્ત વચ્ચે કામગીરી પૂર્ણ

કોઈપણ અનિચ્છનીય ઘટના કે કાયદો-વ્યવસ્થાની સ્થિતિ ન બગડે તે માટે કંડલા મરીન પોલીસ સહિતના ઉચ્ચ પોલીસ અધિકારીઓનો કાફલો ઘટનાસ્થળે તૈનાત રાખવામાં આવ્યો હતો. ભારે તણાવ અને વિરોધની આશંકાઓ વચ્ચે પણ તંત્રએ મક્કમતાપૂર્વક આ ઓપરેશનને કોઈપણ વિઘ્ન વિના સફળતાપૂર્વક પૂર્ણ કર્યું હતું. કંડલાના આ ઔદ્યોગિક અને સંવેદનશીલ ઝોનમાં તંત્ર દ્વારા લેવાયેલા આ કડક પગલાંને પગલે સરકારી જમીનો પચાવી પાડનારા અને ગેરકાયદેસર બાંધકામો ખડકનારા દબાણકારોમાં ભારે ફફડાટ અને દોડધામ વ્યાપી ગઈ છે. 

ગુજરાતના વધુ સમાચાર વાંચવા માટે ક્લિક કરો