Karamsad: સ્વતંત્ર રાખવાની માગણી સાથે આજથી ધરણા-પ્રદર્શન

સરદાર વલ્લભભાઈ પટેલના વતન કરમસદને આણંદ મહાનગર પાલિકામાં સમાવવાનો સ્થાનિક નગરજનો ઉગ્ર વિરોધ કરી રહ્યા છે, ત્યારે 9 ફેબ્રુઆરીથી કરમસદને સ્વતંત્ર દરજ્જો આપવાની માંગ સાથે ઘરણાં પ્રદર્શન શરૂ થશે. સરદાર સન્માન સંકલ્પ આંદોલન સમિતિ દ્ધારા આ આંદોલનનું બ્યુગલ ફૂંકવામાં આવ્યું છે.જેમાં સમિતિના પ્રમુખ મિથિલેશ અમીન તથા અન્ય નેતાઓ સહિત પૂર્વ મુખ્યમંત્રી શંકરસિંહ વાઘેલા તેમજ મંદિરના મહંતો, નગરના વેપારીઓ ઉપરાંત નગરજનો, ભાજપના કેટલાક કાર્યકરો અને સરદાર પ્રેમીઓ આ આંદોલનમાં જોડાશે. આ સ્થિતિ વચ્ચે તાજેતરમાં ભાજપના કાર્યકર ચિરાગ પટેલ સહિતના પાર્ટીના અન્ય કેટલાક કાર્યકરોએ કરમસદખાતે સરદાર પટેલના નિવાસ સ્થાનની મુલાકાત લઈ આ આંદોલનને ટેકો જાહેર કર્યો હતો. ખુદ ભાજપના કેટલાક નેતાઓ જ કરમસદને આણંદ મહાનગર પાલિકામાં જોડવાનો વિરોધ કરી કરમસદને સ્વતંત્ર દરજ્જો આપવાની માંગ કરી રહ્યા છે. 19 ફેબ્રુઆરી સુધી ઘરણાં પ્રદર્શન ચાલનાર છે. જેમાં કરમસદને આણંદ મહાનગર પાલિકામાં ન જોડવા અને તેને સ્વતંત્ર રાખવાની માંગ સાથે કલેક્ટરને આવેદનપત્ર આપવા સહિતના વિવિધ કાર્યક્રમો યોજી આંદોલન કરવામાં આવનાર છે.