Gandhinagar અક્ષરધામ ખાતે દીપોત્સવની ઉજવણી: 8થી 15 નવેમ્બર સુધી 10,000 દીવડાઓથી ઝળહળી ઉઠશે મંદિર પરિસર

દિવાળીના પવિત્ર તહેવાર નિમિત્તે રાજ્યના પાટનગર ગાંધીનગર સ્થિત વિશ્વપ્રસિદ્ધ અક્ષરધામ મંદિર ખાતે ભવ્ય દીપોત્સવની ઉજવણીનું સુંદર આયોજન કરવામાં આવ્યું છે. અક્ષરધામ મંદિરમાં છેલ્લા 34 વર્ષથી પ્રકાશ પર્વની પરંપરાગત ઉજવણી કરવામાં આવે છે, જે અંતર્ગત આ વર્ષે પણ આગામી 8 નવેમ્બરથી 15 નવેમ્બર સુધી આકર્ષક દીપોત્સવ યોજાનાર છે, જેનાથી સમગ્ર મંદિર પરિસર દિવ્ય પ્રકાશથી મુગ્ધ કરી દે તેવું બની રહેશે.

10,000 દીવડાઓ અને વિશેષ આયોજનથી અલૌકિક નજારો

પ્રાપ્ત વિગતો અનુસાર, દિવાળી પર્વ નિમિત્તે અક્ષરધામ મંદિરને આશરે 10,000 દીવડાઓ તથા મનોહર રોશનીથી પ્રકાશિત કરવામાં આવશે. આગામી 8 દિવસ સુધી ચાલનાર આ ઉત્સવ દરમિયાન દેશ-વિદેશથી આવતા દર્શનાર્થીઓ સાંજની વેળાએ આ અલૌકિક નજારાનો લાભ લઈ શકશે. ગ્લો ગાર્ડન અને નીલકંઠ વાટિકામાં વિશેષ આયોજન કરવામાં આવ્યું છે, જે મુલાકાતીઓ માટે મુખ્ય આકર્ષણનું કેન્દ્ર બનશે.

49 ફૂટ ઊંચી નીલકંઠ મૂર્તિ થશે પ્રકાશિત

અક્ષરધામ પરિસરની મુખ્ય વિશેષતા સમાન 108 ગૌમુખની પવિત્ર જલધારા વચ્ચે બિરાજેલી અદભુત 49 ફૂટ ઊંચી નીલકંઠ મૂર્તિ આ દીપોત્સવ દરમિયાન વિશેષ રોશનીથી ઝળહળી ઉઠશે. પાણીના પ્રવાહ અને રંગબેરંગી પ્રકાશનો અદભુત સમન્વય દર્શનાર્થીઓ માટે એક અવિસ્મરણીય અનુભવ સાબિત થશે. 34 વર્ષથી ચાલી આવતી આ પરંપરા મુજબ અક્ષરધામમાં તહેવારનો અનેરો ઉત્સાહ જોવા મળી રહ્યો છે.

ગુજરાતના વધુ સમાચાર વાંચવા માટે ક્લિક કરો