Gandhinagar News: DGPના જનસંપર્ક કાર્યાલયમાં 8 મહિનામાં 310 રજૂઆતો, 28 ગંભીર બાબતોમાં તાત્કાલિક FIR

રાજ્યના છેવાડાના માનવીને ત્વરિત પારદર્શક અને સંવેદનાસભર ન્યાય મળે તેવા સંકલ્પ સાથે પોલીસ ભવન ગાંધીનગર ખાતે શરૂ કરવામાં આવેલું જનસંપર્ક કાર્યાલય આજે રાજ્યના સામાન્ય નાગરિકો માટે અત્યંત વિશ્વાસપાત્ર સેતુ બની ગયું છે. રાજ્યના પોલીસ વડા જ્ઞાનેન્દ્રસિંહ મલિકના સીધા મોનિટરિંગ હેઠળ આ કાર્યાલય દ્વારા નાગરિકોની રજૂઆતોનું સમયબદ્ધ અને પરિણામલક્ષી નિરાકરણ લાવવામાં આવી રહ્યું છે.તા.04 ફેબ્રુઆરી 2026થી કાર્યરત આ કાર્યાલય પ્રત્યે લોકોનો વિશ્વાસ એટલી હદે વધ્યો છે કે માત્ર 8 મહિનાના ટૂંકા ગાળામાં સમગ્ર રાજ્યમાંથી 310 જેટલા અરજદારોએ રૂબરૂ મુલાકાત લઈને પોતાની રજૂઆતો નોંધાવી છે.

ફરિયાદ ધીરજ અને સંવેદનશીલતાથી સાંભળવામાં આવે છે

કોઈ નાગરિક કચ્છ કે સૌરાષ્ટ્રના અંતરિયાળ વિસ્તારોમાંથી લાંબી મુસાફરી કરીને આવતું હોય કે પછી દક્ષિણ ગુજરાતના છેવાડાના આદિવાસી ગામોમાંથી ગાંધીનગર પોલીસ ભવન પહોંચતા જ દરેક અરજદારને પૂરા સન્માન,ધીરજ અને સંવેદનશીલતાથી સાંભળવામાં આવે છે.કોઈ પણ નાગરિક સાથે અન્યાય ન થાય તે માટે પૂર્ણ તકેદારી રાખીને સમર્પિત ટીમ દ્વારા તેમની અરજીઓ સ્વીકારવામાં આવે છે.આ ટીમમાં પોલીસ ઇન્સ્પેક્ટર પલક પટેલ,પોલીસ સબ-ઇન્સ્પેક્ટર એન.જી.બારડ તથા એમ.જે.પટેલ,હેડ કોન્સ્ટેબલ મણીલાલ વણગઈ અને પોલીસ કોન્સ્ટેબલ કિશનભાઈ રાઠોડનો સમાવેશ થાય છે.

પ્રોગેસ રિપોર્ટ મંગાવી સતત એન્ડ-ટુ-એન્ડ ફોલોઅપ

આ ટીમ સ્ટાન્ડર્ડ ઓપરેટિંગ પ્રોસિજર મુજબ અરજી નોંધણી કરીને સંબંધિત શહેર કે જિલ્લાના ઉચ્ચ પોલીસ અધિકારીઓ સાથે તુરંત ટેલિફોનિક સંકલન સાધી જરૂરી સૂચનાઓ આપે છે.જનસંપર્ક કાર્યાલયમાં આવેલી અરજીઓને માત્ર ફોરવર્ડ કરવાને બદલે તથ્યો અને પુરાવાઓના આધારે ગુણદોષ ચકાસી કાયદેસર પગલાં સુનિશ્ચિત કરવામાં આવે છે.જે અંતર્ગત ઉચ્ચ અધિકારીઓના માર્ગદર્શન હેઠળ ગંભીર અને તથ્યપૂર્ણ જણાયેલી બાબતોમાં સંબંધિત પોલીસ સ્ટેશનો મારફતે તુરંત 28 FIR દાખલ કરાવાયા છે.એટલું જ નહીં,અરજી મોકલ્યા બાદ પ્રક્રિયા ક્યાં પહોંચી તે સુનિશ્ચિત કરવા આશરે 67 જેટલી અરજીઓમાં ઉચ્ચ સ્તરેથી પ્રોગેસ રિપોર્ટ મંગાવી સતત એન્ડ-ટુ-એન્ડ ફોલોઅપ લેવાયું છે.

8 અરજદારો સામે નિયમોનુસાર કાયદેસર પગલાં

બીજી તરફ પારદર્શિતા અને ન્યાયપૂર્ણ વ્યવસ્થા જળવાય તે માટે તપાસ દરમિયાન બદઈરાદાપૂર્વક કે ખોટી રજૂઆત કરનારા 8 અરજદારો સામે નિયમોનુસાર કાયદેસર પગલાં પણ લેવામાં આવ્યા છે. કાર્યાલયની મુલાકાતે આવતા દરેક નાગરિક પાસેથી પારદર્શક રીતે ફીડબેક ફોર્મ ભરાવવામાં આવે છે.પોલીસ સ્ટાફનું નમ્ર વર્તન,સાંભળવાની પદ્ધતિ,ત્વરિત કાર્યવાહી અને યોગ્ય માર્ગદર્શનના આધારે મુલાકાત લેનાર નાગરિકો તરફથી કાર્યાલયની કામગીરીને એકમતે એક્સેલેન્ટ રેટિંગ આપવામાં આવ્યું છે.ગુજરાત પોલીસ પ્રજા સાથે સુમેળ સાધીને સંપૂર્ણ સંવેદનશીલતા, પારદર્શિતા અને જવાબદારીપૂર્વક ન્યાય અપાવવા કટિબદ્ધ છે અને રાજ્ય પોલીસ વડાની ઓફિસનું જનસંપર્ક કાર્યાલય આ દિશામાં એક ઉત્કૃષ્ટ ઉદાહરણ પૂરું પાડી રહ્યું છે.

આ પણ વાંચોઃ Surendranagar News: પોન્ઝી સ્કીમ હેઠળ સોલાર પ્લાન્ટમાં વાહનો ભાડે મૂકવાના નામે રૂ. 3.49 કરોડનું કૌભાંડ, મૂળી પોલીસે 51 વાહનો જપ્ત કર્યા