Amreliમાં લાંબા વિરામ બાદ મેઘરાજાની ફરી એન્ટ્રી, ખેડૂતોમાં ખુશીનો માહોલ

અમરેલી જિલ્લામાં છેલ્લા ઘણા સમયથી વરસાદે ખેંચ તાણ ઊભી કરી હતી અને ઉકળાટ વધી ગયો હતો. પરંતુ લાંબા વિરામ બાદ આખરે મેઘરાજાએ ફરી એકવાર મહેર કરી છે. સાવરકુંડલા તાલુકાના ખડસલી ગામ સહિત આસપાસના વિસ્તારોમાં વાતાવરણમાં અચાનક પલટો આવ્યો હતો અને આકાશ કાળાડીબાંગ વાદળોથી ઘેરાઈ ગયું હતું. મનમૂકીને વરસી પડેલા આ વરસાદથી સમગ્ર પંથકમાં ઠંડક પ્રસરી ગઈ છે.

ખડસલી સહિતના ગ્રામ્ય વિસ્તારોમાં ધીમીધારે વરસાદ

સાવરકુંડલાના ખડસલી ગામમાં ધીમીધારે વરસાદનું આગમન થતાં જ રસ્તાઓ પર પાણી ફરી વળ્યા હતા. ખડસલીની સાથે સાથે આસપાસના અન્ય ગ્રામ્ય વિસ્તારોમાં પણ સરખો વરસાદી માહોલ જામ્યો હતો. ધીમીધારે સતત વરસેલા વરસાદના કારણે વાતાવરણમાં રહેલો અસહ્ય ઉકળાટ અને ગરમી ગાયબ થઈ ગયા છે અને સમગ્ર વિસ્તાર આહલાદક બની ગયો છે.

પાકને નવું જીવન મળતાં ખેડૂતોમાં આનંદ

લાંબા વિરામ બાદ પડેલા આ વરસાદથી સૌથી વધુ રાહત વિસ્તારના ખેડૂતોને થઈ છે. વરસાદ ખેંચાવાના કારણે વાવેલા પાકને લઈને ખેડૂતો ચિંતામાં મુકાયા હતા, પરંતુ આ મેઘમહેરથી સુકાઈ રહેલા પાકને નવું જીવનદાન મળ્યું છે. વરસાદી છાંટા પડતાં જ ખેડૂતોના ચહેરા પર ખુશીનો માહોલ જોવા મળી રહ્યો છે અને આ વરસાદ ખેતી માટે ખૂબ જ ફાયદાકારક સાબિત થશે.

આ પણ વાંચો : Anandના ઉમેટામાં મહીસાગર નદીમાંથી યુવકનો મૃતદેહ મળ્યો: બ્રિજ પર બાઇક પાર્ક કરી નદીમાં ઝંપલાવ્યું હતું