10th Board Exam: શાળાઓ આજથી હોલ ટિકિટ ડાઉનલોડ કરી શકશે

ધોરણ-10ની જાહેર પરીક્ષા 27 ફેબ્રુઆરીથી શરૂ થવાની છે. પરીક્ષાર્થીઓના પ્રવેશપત્ર બોર્ડની વેબસાઈટ પર મુકાયા છે. પ્રવેશપત્ર શાળા દ્વારા શાળાનો ઈન્ડેક્ષ નંબર તથા શાળાનો નોંધાયેલ મોબાઈલ નંબર અથવા ઈ-મેઈલ આઇ.ડી. દ્વારા લોગીન કરી ડાઉનલોડ કરી શકાશે તેમ શિક્ષણ બોર્ડના પ્રતિનિધિ રાજૂ ભટ્ટએ જણાવ્યુ હતું.

કોઈ પણ વિસંગતતા જણાય તો બોર્ડની કચેરીનો સંપર્ક કરવો

પ્રવેશપત્ર (હોલટિકિટ)ની પ્રિન્ટ કાઢીને પરીક્ષાર્થીના ફેબ્રુઆરી-2025 પરીક્ષાના આવેદનપત્ર મુજબના વિષયો/માધ્યમની ખરાઈ કરીને પ્રવેશપત્ર (હોલટિકિટ)માં નીચે નિયત કરેલ જગ્યાએ પરીક્ષાર્થીનો ફોટો ચોંટાડી, પરીક્ષાર્થીની સહી, પરીક્ષાર્થીના વર્ગ શિક્ષકની સહી તેમજ નિયત જગ્યાએ આચાર્યનાના સહી-સિક્કા કરીને પરીક્ષાર્થીઓને આપવાની રહેશે અને તેની સાથે પરીક્ષાર્થીને પરીક્ષા માટેની ધોરણ-10ની સૂચના પ્રવેશપત્ર (હોલટિકિટ)ના પાછળના ભાગે પ્રિન્ટ કરી પરીક્ષાર્થી અને આચાર્યની સહી સાથે ફરજિયાત આપવાની રહેશે. પ્રવેશપત્ર (હોલટિકિટ) સાથે ઓનલાઈન મૂકવામાં આવેલ વિતરણ યાદીમાં પ્રવેશપત્ર (હોલટિકિટ) તથા સૂચના આપ્યા બદલની સહી લેવાની રહેશે. પરીક્ષાર્થીના વિષયો બાબતે કે અન્ય કોઈ વિસંગતતા જણાય તો બોર્ડની ગાંધીનગર ખાતેની કચેરીની માધ્યમિક શાખાનો જરૂરી આધારો સાથે સંપર્ક કરવાનો રહેશે.

પરીક્ષણ કાર્ય માટે શિક્ષકોના નિમણૂંક પત્રના ઓર્ડરો પણ કરાયા

ફેબ્રુઆરી-2025ની પરીક્ષાના પરીક્ષણ કાર્ય માટે મધ્યસ્થ મૂલ્યાંકન કેન્દ્ર પરના શિક્ષકોના નિમણૂકપત્ર હોલટિકિટ સાથે ઓનલાઈન જ મોકલી આપવામાં આવ્યા છે. જે શાળા દ્વારા ઓનલાઈન ડાઉનલોડ કરવાના રહેશે અને નિમણૂક પામેલા શિક્ષકને જરૂરી વિગતો ભરી નિમણૂકપત્ર તથા સૂચનાઓ સુપ્રત કરવાની રહેશે. નિમણૂકપત્રની વિતરણ યાદી ડાઉનલોડ કરી તેમાં શિક્ષકઓને નિમણૂકપત્ર મળ્યા બદલની સહી મેળવી શાળાના રેકર્ડ પર રાખવાની રહેશે અને નિમણૂક પત્રની નકલ પણ શાળા કક્ષાએ સાચવી રાખવાની રહેશે.