વાવ થરાદ: વાસણા પ્રાથમિક શાળામાં બાળકોના સ્વાસ્થ્ય સાથે ખેલ! દૂધ સંજીવનીના પાઉચ હલકી ગુણવત્તાવાળા નીકળ્યા

Vav Tharad News: સરકાર દ્વારા પ્રાથમિક શાળામાં બાળકોને પૌષ્ટિક આહાર મળી રહે તે માટે કરોડો રૂપિયાના ખર્ચે ‘દૂધ સંજીવની યોજના’ ચલાવવામાં આવી રહી છે, પરંતુ વાવ થરાદના લાખણી તાલુકાના વાસણા ગામે પ્રાથમિક શાળામાં બાળકોને વિતરણ કરવા માટે આવેલા દૂધ સંજીવનીના પાઉચ અત્યંત હલકી ગુણવત્તાવાળા અને બગડેલા હોવાનું સામે આવતા ગામલોકોમાં આક્રોશ જોવા મળી રહ્યો છે. આ બગડેલા દૂધનો વીડિયો સોશિયલ મીડિયામાં વાઇરલ થતાં સમગ્ર જિલ્લાના શિક્ષણ અને વહીવટી તંત્રમાં દોડધામ મચી ગઈ છે.

શાળામાં હલકી ગુણવત્તાવાળું દૂધ આપતાં સ્થાનિકોમાં રોષ

પ્રાપ્ત વિગતો મુજબ, શાળામાં બગડેલા દૂધના પાઉચ મામલે ગ્રામજનો અને વાલીઓના ધ્યાને બાબત આવતા તેમણે તાત્કાલિક શાળા પર પહોંચીને હોબાળો મચાવ્યો હતો. ગામલોકોએ રોષે ભરાઈને પૂછ્યું હતું કે, 'જો માસૂમ બાળકોએ આ ઝેરી અને બગડેલા દૂધનો ઉપયોગ કરી લીધો હોત અને કોઈ મોટી અનિચ્છનીય ઘટના કે ફૂડ પોઈઝનિંગ જેવો બનાવ સર્જાયો હોત તો તેની જવાબદારી કોણ લેત?' તંત્રની આ બેદરકારી સામે ગ્રામજનોએ એકસૂરે નિર્ણય કરીને શાળામાં આવા હલકી ગુણવત્તાવાળા દૂધનો સ્વીકાર કરવાનો સ્પષ્ટ બહિષ્કાર કરી દીધો છે.