Surendranagarના નગરજનો માટે ખુશીની વાત, નાબાર્ડનો ક્રેડિટ પ્લાન કલેકટરે જાહેર કર્યો

સુરેન્દ્રનગર જિલ્લામાં ગ્રામીણ ધિરાણ આયોજન માટેનો રોડ મેપ વર્ષ ૨૦૨૫-૨૬ માટેનો સંભવિત લિન્ક્ડ ક્રેડિટ પ્લાન (પીએલપી) જિલ્લા કલેકટર કે. સી. સંપટ દ્વારા સત્તાવાર રીતે અનાવરણ કરવામાં આવ્યું હતું.સુરેન્દ્રનગર અને મોરબી જિલ્લાઓ માટે નાબાર્ડના ડિસ્ટ્રિક્ટ ડેવલપમેન્ટ મેનેજર (ડીડીએમ) શ્રી સંજય વૈદ્ય દ્વારા સાવચેતીપૂર્વક તૈયાર કરવામાં આવેલા સર્વગ્રાહી પીએલપી દસ્તાવેજમાં નાણાકીય વર્ષ ૨૦૨૫-૨૬ માટે અગ્રતા ક્ષેત્રમાં રૂ. ૭૫૭૩.૮૮ કરોડની ધિરાણ ક્ષમતાનું આયોજન કરવામાં આવ્યું છે. ગ્રામીણ લોકોને થશે ફાયદો ક્ષેત્રવાર ધિરાણ અંદાજોમાં કૃષિ ધિરાણ માટે રૂ. ૪૮૧૭.૯૫ કરોડ, કૃષિ માળખા માટે રૂ.૫૧૫.૫૦ કરોડ અને કૃષિ આનુષંગિક પ્રવૃત્તિઓ માટે રૂ. ૧૩૦.૭૦ કરોડનો સમાવેશ થાય છે. પીએલપીમાં એમએસએમઈ માટે રૂ. ૧૭૭૦.૬૮ કરોડ, હાઉસિંગ માટે રૂ. ૨૫૨.૮૦ કરોડ અને નિકાસ ધિરાણ, શિક્ષણ, પુનઃપ્રાપ્ય ઊર્જા અને સામાજિક માળખા માટે નાની છતાં નોંધપાત્ર ફાળવણીનું પણ આયોજન કરવામાં આવ્યું છે. આ દસ્તાવેજનો ઉદ્દેશ જિલ્લાનાં વિકાસની પ્રાથમિકતાઓ સાથે ધિરાણના પ્રવાહને સંરેખિત કરવાનો, સર્વ સમાવેશક વિકાસ અને ગ્રામીણ સમૃદ્ધિને સરળ બનાવવાનો છે. લક્ષ્યાંક સામે કુલ પ્રાયોરિટી સેક્ટર લેન્ડિંગ ડીડીએમ સંજય વૈદ્યએ નાણાકીય વર્ષ ૨૦૨૩-૨૪ માં જિલ્લાની મજબૂત ધિરાણ કામગીરી પર પ્રકાશ પાડ્યો હતો, જેમાં પાક ધિરાણમાં ૯૭ ટકા લક્ષ્યાંક હાંસલ કર્યો છે અને કુલ કૃષિ ધિરાણમાં ૯૯.૦૯ ટકાની સિદ્ધિ હાંસલ કરી છે. એમએસએમઇએ અપેક્ષાને વટાવીને ૧૨૬.૯૪ ટકા લક્ષ્યાંક હાંસલ કર્યો હતો. જ્યારે એકંદરે પ્રાદેશિક સિદ્ધિઓ ૧૦૪.૫૭ ટકા રહી હતી, જેમાં વાર્ષિક ક્રેડિટ પ્લાન (એસીપી)ના રૂ. ૫૭૭૪.૯૧ કરોડના લક્ષ્યાંક સામે કુલ પ્રાયોરિટી સેક્ટર લેન્ડિંગ (પીએસએલ) રૂ. ૬૦૩૮.૫૫ કરોડનો પ્રવાહ હતો. ગ્રામીણ પરિવર્તનમાં નોંધપાત્ર ફાળો નાબાર્ડ દ્વારા સૌપ્રથમ વખત ૧૯૮૯-૯૦ માં પ્રસ્તુત કરવામાં આવેલી પીએલપી કૃષિ, એમએસએમઇ અને ગ્રામીણ માળખાગત સુવિધા જેવા પ્રાથમિકતા ધરાવતા ક્ષેત્રોમાં ધિરાણ સાથે સંકળાયેલી રોકાણની તકોનું મૂલ્યાંકન કરવા અને તેને પ્રોત્સાહન આપવા માટેનું મુખ્ય સાધન છે. સમય જતાં તે આબોહવાને અનુકૂળ કૃષિ, પુનઃપ્રાપ્ય ઊર્જા અને સ્થાયી વિકાસનાં લક્ષ્યાંકો (એસડીજી) જેવી ઉભરતી જરૂરિયાતોને સામેલ કરવા માટે વિકસ્યું છે. સંભવિતતાને ઓળખીને અને જિલ્લા વિકાસ યોજનાઓ અને સંસ્થાકીય ધિરાણ વચ્ચેના તફાવતને દૂર કરીને, પીએલપી સંસાધનોની ફાળવણીને સક્ષમ બનાવે છે, જે સર્વસમાવેશક વૃદ્ધિ અને નાણાકીય સર્વસમાવેશકતાને પ્રોત્સાહન આપે છે.વિકાસના ધ્યેયો સાથે ધિરાણને સુસંગત કરવા પર મજબૂત ધ્યાન કેન્દ્રિત કરવા સાથે, પીએલપી ૨૦૨૫ -૨૬ સુરેન્દ્રનગરના ગ્રામીણ પરિવર્તનમાં નોંધપાત્ર ફાળો આપે તેવી અપેક્ષા છે, જે તેને જિલ્લાની પ્રગતિ માટે એક મહત્વપૂર્ણ બ્લુપ્રિન્ટ બનાવે છે.