Surendranagar: ખેરવા ગામમાં મદ્રેસા બનાવવા માટે રાખેલા રૂ. બે લાખની ચોરી

દસાડા તાલુકાના ખેરવા ગામે રહેતા વૃધ્ધે જમીન વેચાણના આવેલા નાણામાંથી રૂપિયા બે લાખ ગામમાં મદ્રેસો બનાવવા અલગ રાખ્યા હતા. ત્યારે તા. 11મીથી 21મી જુલાઈ દરમિયાન કોઈ શખ્સ આ રકમ ચોરી કરી લઈ ગયાની બજાણા પોલીસ મથકે ફરિયાદ નોંધાઈ છે.

 ખેરવામાં રહેતા 66 વર્ષીય અબ્દુલખાન રામલજી મલેક ખેતી કરે છે. તેમના પિતાજીની 100 વીઘા પૈકી 21 વીઘા જમીન તેઓએ વર્ષ 2021માં 12 લાખમાં વેચી હતી. જેમાંથી રૂપિયા 10 લાખની ફીકસ ડીપોઝીટ કરાવી હતી. જયારે 2 લાખ રૂપિયા રામલજી મલેકે તેમની પાસે ગામમાં મદ્રેસો બનાવવા અલગ રાખ્યા હતા. તેમના ઘરે ધાબુ ભરવાનું કામ ચાલતુ હોઈ અવારનવાર અબ્દુલખાન આ રૂપિયા તેમને દઈ દેવા રામલજીને કહેતા હતા. પરંતુ તેઓ જીદ્દી સ્વભાવના અને માનસીક અસ્વસ્થ હોઈ આ નાણાં તેમની પાસે કબાટમાં જ રાખતા હતા. તા. 11મીથી 21મી જુલાઈ દરમિયાન કોઈ શખ્સ રૂ. 2 લાખની રોકડ ચોરી ગયાની તેઓને તા. 21મીએ જાણ થઈ હતી. આ અંગે અબ્દુલખાને અજાણ્યા શખ્સ સામે બજાણા પોલીસ મથકે ફરિયાદ નોંધાવતા વધુ તપાસ પીઆઈ એમ.બી.બામ્બા ચલાવી રહ્યા છે.