Gujarat Weather News: વલસાડ શહેર અને જિલ્લામાં ધોધમાર વરસાદ, ભારે પવન ફૂંકાયો

ગુજરાતમાં ચોમાસાની વિદાય બાદ પણ માવઠાની આગાહી કરવામાં આવી છે.જેના કારણે ખેડૂતોમાં ચિંતાનો માહોલ છે.આગામી 7 દિવસ સુધી રાજ્યના અનેક વિસ્તારોમાં વરસાદી માહોલ રહેશે.આ વરસાદનું મુખ્ય કારણ બંગાળની ખાડીમાં સિસ્ટમ સક્રિય થવી અને અપરએર સર્ક્યુલેશન અને વેસ્ટર્ન ડિસ્ટર્બન્સની સંયુક્ત અસર છે.જેના કારણે રાજ્યના દક્ષિણ અને મધ્ય ગુજરાતના વિસ્તારોમાં વરસાદ થવાની સંભાવના છે. ત્યારે વલસાડ શહેર અને જિલ્લામાં આજે ભારે વરસાદ ખાબક્યો હતો.

વલસાડ જિલ્લાના વાતાવરણમાં પલટો

આજે વલસાડ જિલ્લાના વાતાવરણમાં પલટો આવ્યો છે. ધરમપુર તેમજ કપરાડામાં વરસાદી માહોલ સર્જાયો છે. ધરમપુરના ફૂલવાડી, ઝરીયા અને ભેંસધરા સહિત બરોલિયા, ધામણી અને બીલપુડીમાં ધોધમાર વરસાદ ખાબક્યો છે. નવા વર્ષની શરૂઆતમાં જ વરસાદ થતાં ખેડૂતોમાં ચિંતાનું મોજુ ફરી વળ્યું છે. વરસાદના કારણે ખેડૂતોના શિયાળુ પાકને નુકસાન થવાની ભિતી છે. બીજી તરફ વલસાડ શહેરમાં ધોધમાર વરસાદ ખાબક્યો હતો. ભારે પવન ફૂંકાતા મીની વાવાઝોડાની અસર વર્તાઈ હતી. પવનને કારણે જિલ્લા સેવાસદનના બિલ્ડિંગને પણ નુકસાન પહોંચ્યું હતું. વરસાદને કારણે શહેરના અલગ અલગ વિસ્તારોમાં પાણી ભરાઈ ગયા હતાં.