Sandesh Digital Explainer: ગુજરાતમાં વહેલી ચૂંટણીની વકી, જેઠા સોલંકીની હાથ' સાથે વાપસીથી ભાજપમાં દોડધામ!

સામાન્ય રીતે ગોવાની સાથે ગુજરાત વિધાનસભાની ચૂંટણીઓ વર્ષ 2027 ના અંતમાં નિર્ધારિત છે. જોકે, કોંગ્રેસ પક્ષના વરિષ્ઠ નેતા અને વિધાનસભા વિરોધ પક્ષના નેતા ડૉ. તુષાર ચૌધરીએ મોરબી ખાતે યોજાયેલી વિશાળ સભામાંથી "ગુજરાતમાં વહેલી ચૂંટણી યોજાઈ શકે છે" તેવું સનસનાટીભર્યું નિવેદન આપીને રાજ્યના રાજકીય તાપમાનમાં અચાનક મોટો ઉછાળો લાવી દીધો છે. એક તરફ ગુજરાત કોંગ્રેસના પ્રભારી રણદીપ સિંહ સુરજેવાલા અને પ્રદેશ પ્રમુખ અમિત ચાવડાની આગેવાનીમાં મોરબીમાં 'ખેડૂત આક્રોશ મહાસભા' યોજાઈ, તો બીજી તરફ રાજકોટમાં ભાજપના પૂર્વ ધારાસભ્ય જેઠાભાઈ સોલંકીએ ઘરવાપસી કરતાં સૌરાષ્ટ્રના રાજકીય સમીકરણોમાં નવી હિલચાલ શરૂ થઈ ગઈ છે.મોરબી ખાતે યોજાયેલી કોંગ્રેસની આક્રોશ સભા

ઉત્તર પ્રદેશ અને પંજાબમાં 2027 ની શરૂઆતમાં ફેબ્રુઆરી-માર્ચમાં ચૂંટણીઓ યોજાવાની છે. ડૉ. તુષાર ચૌધરીએ દાવો કર્યો કે ભાજપ સરકાર સામે ગ્રામીણ વિસ્તારોમાં વધી રહેલા રોષને જોતાં રાજ્યમાં નિર્ધારિત સમય કરતાં વહેલી ચૂંટણીનો સામનો કરવો પડી શકે છે. મોરબી અને સૌરાષ્ટ્રના ખેડૂતોના ખેતરોમાં સંમતિ વિના ઊભા કરાતા ખાનગી કંપનીઓના હાઈ-ટેન્શન પાવર ટાવર અને ટ્રાન્સમિશન લાઈનોનો કોંગ્રેસે જોરદાર વિરોધ કર્યો હતો. ખેડૂતોની કિંમતી જમીન નજીવા વળતરે કોર્પોરેટ ગૃહોને સોંપાતી હોવાનો આક્ષેપ કરાયો. સૌની (SAUNI) યોજના હેઠળ સિંચાઈ માટે ડેમોમાંથી પૂરતું પાણી છોડવામાં આવે.ખેડૂતો માટે કૃષિ લોન સંપૂર્ણ માફ કરવામાં આવે.NPK રાસાયણિક ખાતરોમાં તાજેતરમાં ઝીંકાયેલો ₹500 નો ભાવવધારો તાત્કાલિક પાછો ખેંચાય. કોંગ્રેસે જાહેરાત કરી છે કે મોરબીની આ રેલી બાદ સમગ્ર સૌરાષ્ટ્ર વિસ્તારમાં આંદોલન વધુ ઉગ્ર બનાવવામાં આવશે.

ભાજપના પૂર્વ ધારાસભ્ય જેઠા સોલંકી કોંગ્રેસમાં જોડાયા

વર્ષ 2012 માં ભાજપની ટિકિટ પર કોડીનાર (SC) બેઠક જીતી ચૂકેલા અને પૂર્વ સંસદીય સચિવ રહી ચૂકેલા અગ્રણી દલિત નેતા જેઠાભાઈ દાનાભાઈ સોલંકી રાજકોટ ખાતે રણદીપ સુરજેવાલાની ઉપસ્થિતિમાં વિધિવત કોંગ્રેસમાં પરત ફર્યા છે.સ્થાનિક નેતૃત્વ સામે આક્ષેપો: પક્ષપ્રવેશ બાદ જેઠા સોલંકીએ સ્થાનિક ભાજપ નેતાઓ (દીનુ બોઘા સોલંકી અને શિવ સોલંકી) સામે જાહેરમાં ગંભીર આક્ષેપો કરતાં જણાવ્યું કે કોડીનાર વિસ્તારમાં અસામાજિક તત્વોનો આતંક વધી ગયો છે, જેનાથી સામાન્ય જનતા અને ખેડૂતો ત્રાહિમામ પોકારી ગયા છે. 2022 ની વિધાનસભા ચૂંટણીમાં સૌરાષ્ટ્રમાં નબળા પડેલા કોંગ્રેસ સંગઠન માટે જેઠા સોલંકીની વાપસી એક મોટા બૂસ્ટર ડોઝ સમાન માનવામાં આવી રહી છે.

ભાજપ સામેના પડકારો અને વિશ્લેષણ

સૌરાષ્ટ્ર અને ઉત્તર ગુજરાતના ખેડૂતોમાં ખાતરના ભાવ, પાક વીમો અને જમીન સંપાદન જેવા મુદ્દાઓ સતત સળગી રહ્યા છે. દક્ષિણ અને મધ્ય ગુજરાતના આદિવાસી વિસ્તારોમાં આમ આદમી પાર્ટી (AAP) ના ધારાસભ્ય ચૈતર વસાવાના મુદ્દાને કારણે વિપક્ષ સતત આક્રમક છે. યુવા વર્ગમાં સરકારી ભરતીઓ અને રોજગારીના પ્રશ્નોને લઈને વિપક્ષ આક્રમક રણનીતિ અપનાવી રહ્યો છે. વિધાનસભામાં 156 થી વધુ બેઠકોની પ્રચંડ બહુમતી ધરાવતી ભાજપ સરકાર સામે વહેલી ચૂંટણીમાં જવાનું કોઈ બંધારણીય કારણ નથી, પરંતુ વિપક્ષ દ્વારા આવા દાવા કરીને પોતાના કાર્યકરોમાં નવો પ્રાણ ફૂંકવાનો અને ચૂંટણીલક્ષી માહોલ ઊભો કરવાનો વ્યૂહાત્મક પ્રયાસ કરવામાં આવી રહ્યો છે.

આ પણ વાંચો: Sandesh Digital Explainer: પંજાબથી બિહાર સુધી ગરમીનો પ્રકોપ વધ્યો, દક્ષિણ ભારતમાં વરસાદમાં વધારો થયો