Rajkotમાં બેફામ ડમ્પરનો કહેર, વધુ એક નિર્દોષ યુવકે ગુમાવ્યો જીવ

રાજકોટમાં ડમ્પરચાલકોનો બેફામ બનવાનો સિલસિલો યથાવત રહ્યો છે. જેના કારણે વધુ એક નિર્દોષ યુવકે જીવ ગુમાવ્યો છે. મોરબી રોડ પર એક ડમ્પરચાલકે ગંભીર અકસ્માત સર્જીને બાઇકચાલક યુવકનો ઘટનાસ્થળે જ જીવ લીધો છે. આ ગમખ્વાર અકસ્માતનું મુખ્ય કારણ ડમ્પરચાલકની બેદરકારી છે. ડમ્પરચાલક રોંગ સાઇડથી પૂરપાટ ઝડપે આવી રહ્યો હતો. જેના કારણે તેણે માર્ગ પરના ત્રણથી ચાર વાહનોને અડફેટે લીધા હતા.

રોંગ સાઈડ આવતા ડમ્પરચાલકે સર્જ્યો અકસ્માત

આ ભયાનક ટક્કરમાં એક બાઇકચાલક યુવક ગંભીર રીતે ઘાયલ થયો હતો અને તેનું ઘટનાસ્થળે જ કરૂણ મોત નીપજ્યું હતું. આ ઉપરાંત અકસ્માતમાં અન્ય એક વ્યક્તિની હાલત પણ ગંભીર હોવાનું જાણવા મળી રહ્યું છે. રાજકોટમાં ડમ્પર દ્વારા સર્જાયેલા અકસ્માતોની ઘટનાઓ ચિંતાજનક રીતે વધી રહી છે. છેલ્લા 15 દિવસમાં ડમ્પર અકસ્માતોને કારણે ત્રણ લોકોએ જીવ ગુમાવ્યા છે. ટ્રાફિકના નિયમોનું ઉલ્લંઘન કરીને બેફામ ચલાવાતા ડમ્પરો હવે શહેરીજનો માટે જીવલેણ બની રહ્યા છે.

સમગ્ર મામલે પોલીસે વધુ તપાસ હાથ ધરી

અકસ્માત સર્જાયા બાદ ડમ્પરચાલક પોતાનું વાહન ઘટનાસ્થળે મૂકીને ફરાર થઈ ગયો હતો. અકસ્માતની જાણ થતાં જ પોલીસની ટીમ તાત્કાલિક ઘટનાસ્થળ પર પહોંચી હતી. પોલીસે ફરાર ડમ્પરચાલકને ઝડપી પાડવા અને સમગ્ર મામલે કાયદેસરની વધુ તપાસ હાથ ધરી છે. ડમ્પરચાલકો સામે કડક કાર્યવાહી કરવામાં આવે તેવી માંગણી સ્થાનિકો દ્વારા કરવામાં આવી રહી છે.