Rajkot સહિત સમગ્ર સૌરાષ્ટ્રમાંથી ચોમાસાની વિદાય ટાણે છવાયા જળસંકટના વાદળો

રાજકોટ સહિત સમગ્ર સૌરાષ્ટ્ર પ્રદેશમાંથી ચોમાસાની સત્તાવાર વિદાયની તૈયારીઓ થઈ રહી છે, ત્યારે આ વર્ષે વરસાદની અનિયમિતતાને કારણે જળસંકટનો ભય તોળાઈ રહ્યો છે. ચાલુ સિઝનમાં અપેક્ષાનુરૂપ સાર્વત્રિક વરસાદ ન થતાં સૌરાષ્ટ્રના જળાશયોમાં પૂરતો પાણીનો જથ્થો આવ્યો નથી. પ્રદેશના મુખ્ય 83 ડેમોમાંથી માત્ર 4 ડેમો જ પૂર્ણ ક્ષમતાથી ઓવરફ્લો થઈ શક્યા છે. ચોમાસું પૂરું થવાના આરે છે ત્યારે આંકડાઓ સામે આવતાં ભવિષ્યમાં પીવાના અને સિંચાઈના પાણીની ભારે અછત સર્જાય તેવી શક્યતાઓ સેવાઈ રહી છે.

ડેમોમાં પાણીની સ્થિતિ ચિંતાજનક 

જળાશયોની વર્તમાન પરિસ્થિતિ પર નજર કરીએ તો ચિત્ર ખૂબ જ ચિંતાજનક ઉપસી રહ્યું છે. સમગ્ર સૌરાષ્ટ્રના 6 જેટલા ડેમો વરસાદની ભારે અછતને કારણે બિલકુલ ખાલીખમ રહ્યા છે. આ ઉપરાંત, અન્ય 24 ડેમોમાં માંડ 10 ટકા જેટલો જ પાણીનો જથ્થો ઉપલબ્ધ છે. મોટાભાગના જળાશયો તળિયાઝાટક રહેતા આવનારા શિયાળા અને ઉનાળાની સિઝનમાં ગ્રામ્ય તેમજ શહેરી વિસ્તારોમાં પાણીનું મોટું સંકટ ઉભું થાય તેવા સંકેતો મળી રહ્યા છે.

દ્વારકા અને જામનગર જિલ્લામાં સૌથી કપરી સ્થિતિ 

સૌરાષ્ટ્રના તમામ જિલ્લાઓમાંથી ખાસ કરીને દેવભૂમિ દ્વારકા અને જામનગર જિલ્લામાં સ્થિતિ સૌથી વધુ કપરી જોવા મળી રહી છે. આ વિસ્તારોમાં સરરેરાશ કરતાં ઓછો વરસાદ નોંધાવાને કારણે સ્થાનિક ડેમો અને જળાશયો સુકાઈ રહ્યા છે. પાણીની તંગીને કારણે ખેડૂતોમાં પોતાના પાકને લઈને ભારે ચિંતા વ્યાપી ગઈ છે. સ્થાનિક પ્રશાસન દ્વારા પણ આગામી સમયમાં પાણીનું યોગ્ય વિતરણ અને વ્યવસ્થાપન કરવા માટે અત્યારથી જ આયોજન ઘડી કાઢવાની જરૂરિયાત ઉભી થઈ છે.

ગુજરાતના વધુ સમાચાર વાંચવા માટે ક્લિક કરો