Rajkot News : ગોંડલમાં વહેલી સવારે 'હિલ સ્ટેશન' જેવો નજારો, ગાઢ ધુમ્મસથી વિઝિબિલિટી ઘટી

તાજેતરમાં સક્રિય થયેલા 'શક્તિ' વાવાઝોડાની ગુજરાત પરની ગંભીર અસર ઘટી છે, જેનાથી તંત્ર અને નાગરિકોએ રાહતનો શ્વાસ લીધો છે. જોકે, વાવાઝોડું નબળું પડ્યું હોવા છતાં તેની સિસ્ટમના કારણે રાજ્યના વાતાવરણમાં ભેજ અને અસ્થિરતાનો માહોલ હજી પણ જળવાઈ રહ્યો છે. હવામાન વિભાગના મતે, આગામી દિવસોમાં મોટા ભાગના વિસ્તારોમાં ભારે વરસાદની સંભાવના ભલે ન હોય, પરંતુ સ્થાનિક સ્તરે હળવોથી મધ્યમ વરસાદી ઝાપટાં પડવાની શક્યતા છે. ભેજવાળા વાતાવરણને કારણે લોકો બફારાનો અનુભવ કરી રહ્યા છે, જ્યારે ખેડૂતો અનિશ્ચિત હવામાનના કારણે ચિંતિત છે.

ગોંડલમાં વહેલી સવારે ગાઢ ધુમ્મસનો અહેસાસ

હવામાનની આ અનિયમિતતા વચ્ચે રાજકોટ જિલ્લાના ગોંડલમાં આજે વહેલી સવારે અસામાન્ય દ્રશ્યો જોવા મળ્યા હતા. શહેર અને આસપાસના વિસ્તારોમાં એટલું ગાઢ ધુમ્મસભર્યું વાતાવરણ સર્જાયું હતું કે જાણે કોઈ હિલ સ્ટેશન પર આવ્યા હોઈએ! આ અણધાર્યા વાતાવરણના કારણે સવારનો નજારો ખૂબ જ રમણીય બની ગયો હતો, પરંતુ વિઝિબિલિટી ખૂબ જ ઘટી જવાને કારણે સામાન્ય જનજીવન પર અસર પડી હતી. વાતાવરણમાં ભેજના ઊંચા પ્રમાણ અને તાપમાનના ઘટાડાને કારણે આ ધુમ્મસની ચાદર છવાઈ હતી.

ધુમ્મસના કારણે વાહનચાલકો પરેશાન

ગોંડલના આ ધુમ્મસભર્યા વાતાવરણને કારણે વાહનચાલકોને ભારે પરેશાનીનો સામનો કરવો પડ્યો હતો. હાઇવે અને મુખ્ય માર્ગો પર વિઝિબિલિટી (દ્રશ્યતા) એટલી ઘટી ગઈ હતી કે થોડા ફૂટ દૂરનું પણ સ્પષ્ટ દેખાતું નહોતું. અકસ્માતો ટાળવા માટે વાહનચાલકોને ફરજિયાતપણે પોતાની હેડલાઇટ અને ફોગ લાઇટ ચાલુ રાખવાની ફરજ પડી હતી. સવારના સમયે કામકાજ પર જતા લોકો અને દૂધ તેમજ અન્ય માલસામાનનું પરિવહન કરતા વાહનોને તેમની ગતિ ધીમી કરવી પડી હતી. પોલીસે પણ લોકોને વાહન ધીમેથી ચલાવવા અને ટ્રાફિકના નિયમોનું પાલન કરવા માટે અપીલ કરી હતી.