Kheda News: દારૂના નશામાં નાના ભાઈનું તાંડવ, પોતાના જ ઘરમાં આગ ચાંપી, 75 હજારનો સામાન રાખ

નશાની લત કેવી રીતે હસતા-રમતા પરિવારને બરબાદ કરી શકે છે, તેનો જીવંત દાખલો નવા બિલોદરા ગામના કર્મવીરનગર વિસ્તારમાં જોવા મળ્યો છે. અહીં દારૂના નશામાં ધુત એક યુવકે પોતાના જ ઘરમાં તોડફોડ કરી આગ લગાવી દેતા અફરાતફરી મચી ગઈ હતી. આ ઘટનામાં ઘરનો કિંમતી સામાન બળીને ખાખ થઈ ગયો છે.

નશામાં ભાન ભૂલ્યો નાનો ભાઈ

ઘટનાની મળતી માહિતી અનુસાર, કર્મવીરનગર વિસ્તારમાં રહેતા પરિવારના નાના દીકરાએ દારૂના નશામાં ઘરમાં પ્રવેશ કર્યો હતો. કોઈ બાબતે પરિવારના સભ્યો સાથે ઉગ્ર બોલાચાલી થયા બાદ યુવકે પિત્તો ગુમાવ્યો હતો અને ઘરમાં તોડફોડ શરૂ કરી હતી. નશામાં ભાન ભૂલેલા યુવકે ઘરના ટીવી, પંખા અને અન્ય ઘરેલુ સામાન પર માચીસ ચાંપી આગ લગાવી દીધી હતી.

રૂપિયા 75,000ની મતા બળીને ખાખ

આગના કારણે ઘરની કિંમતી વસ્તુઓ જોતજોતામાં લપેટમાં આવી ગઈ હતી. પ્રાથમિક અંદાજ મુજબ, આ આગજનીમાં અંદાજે રૂપિયા 75,000ની આસપાસની ઘરવખરી બળીને ખાખ થઈ ગઈ છે. પોતાના જ લોહીએ કરેલા આ કૃત્યથી પરિવારના સભ્યો સ્તબ્ધ થઈ ગયા હતા અને આખા વિસ્તારમાં ભયનો માહોલ સર્જાયો હતો.

પરિવારમાં તણાવ અને પોલીસ તપાસ

આ ઘટનાને પગલે પરિવારમાં ભારે તણાવ જોવા મળી રહ્યો છે. દારૂના નશામાં થયેલા આ તાંડવ બાદ સ્થાનિક સ્તરે પણ ચર્ચાઓ જાગી છે. નશાખોર દીકરા સામે કાયદેસરની કાર્યવાહી કરવા અંગે પણ વિચારણા ચાલી રહી છે. ઘરની શાંતિ છીનવી લેનાર આ હિંસક ઘટનાએ ફરી એકવાર દારૂબંધીના કાયદાના અમલીકરણ અને નશાખોરીની ગંભીર અસરો સામે સવાલ ઉભા કર્યા છે.

આ પણ વાંચો - Dakor : હવે ભક્તો પોતાના હાથે ચડાવી શકશે રણછોડરાયજીને ધજા, દોરડા અને ગરગડીના માધ્યમથી ચડી જશે ધજા