Kalol નજીક ONGC પ્લાન્ટમાં લાગી રૌદ્ર આગ: ધમાસણા પાસે ગેધરિંગ સ્ટેશનમાં જ્વાળાઓ ઊઠી

ગાંધીનગર જિલ્લાના કલોલ તાલુકામાંથી એક મોટા સમાચાર સામે આવ્યા છે. કલોલ નજીક આવેલા ધમાસણા ગામ પાસે ONGC (ઓઈલ એન્ડ નેચરલ ગેસ કોર્પોરેશન) ના જીજીએસ (GGS - ગેધરિંગ સ્ટેશન) માં વહેલી સવારે અચાનક જ ભીષણ આગ ભબકી ઊઠી હતી. ઓઈલ અને ગેસ પ્રોસેસિંગ યુનિટમાં એકાએક આગ લાગતાં જ પ્લાન્ટમાં હાજર કર્મચારીઓ અને આસપાસના લોકોમાં ભારે અફરાતફરી અને દોડધામ મચી ગઈ હતી.

આકાશમાં કાળા ડિબાંગ ધુમાડાના ગોટેગોટા ફેલાયા

સવારના સમયે કોઈ અગમ્ય કારણોસર લાગેલી આગે જોતજોતામાં રૌદ્ર સ્વરૂપ ધારણ કરી લીધું હતું. આ ભયાનક આગના કારણે સમગ્ર વિસ્તારમાં અને આકાશમાં કાળા ડિબાંગ ધુમાડાના ગોટેગોટા છવાઈ ગયા હતા. ધુમાડાના ગૂંચળા કિલોમીટરો દૂર દૂર સુધી સ્પષ્ટપણે જોઈ શકાતા હતા, જેના કારણે આસપાસના ગામડાઓના રહીશોમાં પણ ભારે ફફડાટ અને ચિંતાનો માહોલ વ્યાપી ગયો હતો.

ONGC ની ફાયર બ્રિગેડ ઘટનાસ્થળે, આગ પર કાબૂ મેળવવા કવાયત

આગ લાગવાની જાણ થતાં જ ONGC નો પોતાના વિશેષ ફાયર બ્રિગેડનો કાફલો અને ફાયર ફાઈટરો તાત્કાલિક ઘટનાસ્થળે દોડી આવ્યા હતા. ઓઈલ અને ગેસ લાઈન હોવાથી આગ વધુ ન પ્રસરે તે માટે કેમિકલ ફોમ અને પાણીનો મારો ચલાવીને આગ પર કાબૂ મેળવવા માટેની સઘન કવાયત હાથ ધરવામાં આવી છે. સદનસીબે આ બનાવમાં અત્યાર સુધી કોઈ જાનહાનિની માહિતી પ્રાપ્ત થઈ નથી, જોકે આગ કયા કારણોસર લાગી તે અંગે તંત્ર દ્વારા વધુ તપાસ હાથ ધરવામાં આવશે.

ગુજરાતના વધુ સમાચાર વાંચવા માટે ક્લિક કરો