Junagadh: મનપા વોર્ડ-3 ની પેટાચૂંટણીનું મતદાન શરૂ, 12 વર્ષ બાદ 13 હજાર મતદારો મતદાન કરશે

જૂનાગઢ શહેરમાં મહાનગરપાલિકાની ચૂંટણીને લઈને આજે મહત્વનો દિવસ સાબિત થઈ રહ્યો છે. જૂનાગઢ મનપાના ખાલી પડેલા વોર્ડ નંબર-3 ની બેઠક માટે આજે સવારે 7:00 વાગ્યાથી જ પેટાચૂંટણીના મતદાનનો પ્રારંભ થઈ ચૂક્યો છે. આ ચૂંટણી સ્થાનિક નાગરિકો માટે અત્યંત મહત્વની ગણાય છે, કારણ કે વિવિધ ટેકનિકલ અને સીમાસીંકન સંબંધિત કારણોસર આ વોર્ડના નાગરિકો છેલ્લા 12 વર્ષ બાદ પ્રથમ વખત મ્યુનિસિપલ કમિશનર કે કોર્પોરેટર ચૂંટવા માટે પોતાના મતાધિકારનો ઉપયોગ કરી રહ્યા છે.

જૂનાગઢમાં મનપાના વોર્ડ-3ની પેટાચૂંટણી

વોર્ડ નંબર-3 માં નોંધાયેલા અંદાજે 13 હજાર જેટલા નાગરિકો પોતાના મતાધિકારનો ઉપયોગ કરી રહ્યા છે. ચૂંટણી પંચ દ્વારા મતદાન પ્રક્રિયા સરળ અને ઝડપી બને તે માટે સમગ્ર વિસ્તારમાં કુલ 18 મતદાન બૂથો તૈયાર કરવામાં આવ્યા છે.સવારથી જ વિવિધ વયજૂથના મતદારો અને ખાસ કરીને મહિલાઓ તથા વડીલો ઉત્સાહભેર લાઈનમાં ઉભા રહીને પોતાના મતાધિકારનો ઉપયોગ કરતા જોવા મળી રહ્યા છે.

ચુસ્ત પોલીસ બંદોબસ્ત 

કોઈપણ પ્રકારની અપ્રિય ઘટના ન બને અને કાયદો-વ્યવસ્થા જળવાઈ રહે તે માટે જુનાગઢ પોલીસ વિભાગ દ્વારા મતદાન મથકોની અંદર તેમજ આસપાસના વિસ્તારોમાં ચુસ્ત પોલીસ બંદોબસ્ત ગોઠવી દેવામાં આવ્યો છે. ડીવાયએસપી, પીઆઈ અને પીએસઆઈ કક્ષાના અધિકારીઓના માર્ગદર્શન હેઠળ સતત પેટ્રોલીંગ કરવામાં આવી રહ્યું છે. સાંજે મતદાન પૂર્ણ થયા બાદ તમામ EVM મશીનોને સંવેદનશીલ સુરક્ષા વચ્ચે સ્ટ્રોંગ રૂમમાં સીલ કરવામાં આવશે.

આ પણ વાંચો: Surat: ઝાંપાબજારમાં જર્જરિત મકાનની દીવાલ અને શેડ તૂટી પડતાં 3 યુવકો કાટમાળમાં ફસાયા, ફાયર બ્રિગેડે હેમખેમ બહાર કાઢ્યા