Jasdanમાં પતંગની દોરી બાબતે મારામારી, એક જ પરિવારના 7 લોકો પર હુમલો

રાજકોટના જસદણના મોટા દડવા ગામમાં ઉત્તરાયણનો તહેવાર લોહિયાળ બન્યો છે. પતંગની દોરી બાબતે બોલાચાલીમાં મારામારી થઈ છે. મોટા દડવાના જસાપર રોડ પર મારામારીની ઘટના સામે આવી છે. જેમાં ધારીયા અને પાઈપ વડે 10થી વધુ લોકોએ એક જ પરિવારના 6થી 7 લોકો પર હુમલો કર્યો છે.

મારામારીની ઘટનામાં 7 લોકો ઈજાગ્રસ્ત, 3ની હાલત ગંભીર

આ હુમલામાં એક ગર્ભવતી મહિલાને પણ પેટમાં લાતો મારવામાં આવી છે, જેના કારણે મહિલાને ચક્કર આવ્યા અને તે બેભાન થઈ ગઈ હતી. આ મારામારીની ઘટનામાં 7 લોકો ઈજાગ્રસ્ત થયા છે, જેમાં 3 લોકોની હાલત ગંભીર હોવાનું જાણવા મળી રહ્યું છે. મારામારી ઘટના થયા બાદ તાત્કાલિક પોલીસ અને એમ્બ્યુલન્સને જાણ કરવામાં આવી અને ઈજાગ્રસ્તોને જસદણ સિવિલ હોસ્પિટલમાં સારવાર માટે ખસેડવામાં આવ્યા છે. ત્યારે મારામારી અંગેની તપાસ આટકોટ પોલીસે હાથ ધરી છે. 

ઉત્તરાયણમાં રાજકોટમાં દોરીથી 10 લોકોના ગળા કપાયા

આ વર્ષે રાજકોટમાં ઉત્તરાયણનો તહેવાર ઘાતક બન્યો છે. દોરીથી 10 લોકોના ગાળા કપાયા છે. જ્યારે શહેરમાં 21 અકસ્માતની ઘટના બની છે. શહેરમાં અનેક જગ્યાએ અઘટીત બનાવો બનતા ઈમરજન્સી સેવા માટે 108 એમ્બ્યુલન્સ સતત દોડી રહી હતી. સરકારે આ પરિસ્થિતિને ધ્યાને લઈને લોકોને બાઈક પર બહાર ન નીકળવા અને જો બહાર નીકળ્યા જ હોય તો સ્પીડમાં બાઈક ન ચલાવવા અપીલ કરી હતી.

દોરી વાગ્યા બાદ એક યુવાન 16 મિનિટ સુધી તરફડિયા મારતો રહ્યો, કોઈએ એમ્બ્યુલન્સને જાણ ના કરી

રાજકોટ શહેરના મવડી ઓવરબ્રિજ પરથી પસાર થતા 22 વર્ષના મિહિર સોંડાગરના ગળામાં પતંગની દોરી આવતા તેનું ગળું કપાયું હતું અને સ્કૂટર પરથી ઢળી પડ્યો હતો. ગળામાંથી લોહી વહેતું જોતા લોકોએ તેને સારવાર માટે હોસ્પિટલ ખસેડ્યો હતો. લોહી વધારે પડતું વહી જવાના કારણે યુવાનનું ઓપરેશન કરવામાં આવી રહ્યું છે અને યુવાનની હાલત હાલમાં ગંભીર છે. મકરસંક્રાંતિમાં આવી ઘટનાઓમાં સતત વધારો થઈ રહ્યો છે પણ આ કિસ્સામાં ગંભીર બાબત એ છે કે યુવાનનું લોહી વહી રહ્યું હતું અને તરફડિયા મારતો હતો પણ 16 મિનિટ સુધી લોકોએ ફોટો અને વીડિયો ઉતાર્યા કોઈએ એમ્બ્યુલન્સને જાણ કરી ન હતી. એક જાગૃત નાગરિક ત્યાં પહોંચ્યા એટલે તેમણે 108ને જાણ કરી હતી અને સાથે જ તેને ખાનગી હોસ્પિટલમાં લઈ જવાયો હતો.