Godhra: ટેમ્પોમાં ભૂસાની આડમાં લઈ જવાતો રૂા.41.85 લાખનો દારૂ ઝડપાયો

ગોધરા એલ.સી.બી.પોલીસ દ્વારા હાલોલ તાલુકાના બાસ્કા ત્રણ રસ્તા પાસે નાકાબંધી કરી ચણાનાં ભુસાની બોરીઓની આડમાં લઇ જવાતો વિદેશી દારૂ અને બીયરનો રૂા.41,85,670નો જથ્થો તેમજ આઈશર ગાડી મળી કુલ રૂ.54,52,880નો મુદ્દામાલ જપ્ત કરી પાંચ આરોપીઓને ઝડપી પાડી વધુ કાર્યવાહી હાથ ધરી હતી.

ગોધરા એલ.સી.બી.પોલીસનાં પોલીસ સબ ઇન્સ્પેકટર આર.એન.પટેલને બાતમી મળી હતી કે એક આઇસર ગાડીમાં ચણાનાં ભૂસાની બોરિઓની આડમાં મોટી માત્રામાં વિદેશી દારૂ નો જથ્થો લઇ જવામાં આવી રહ્યો છે. આ ગાડી નું પાઇલોટિંગ એક ફોર વ્હીલ કાર કરી રહી છે. જે બાતમી આધારે એલ.સી.બી.પોલીસ સબ ઇન્સ્પેકટર પી.એન.ઝાલા તેમજ સ્ટાફ દ્વારા હાલોલ તાલુકાના બાસ્કા ત્રણ રસ્તા પાસે નાકાબંધી કરી હતી.અને પોલીસની જે નાકાબંધી દરમિયાન બાતમી વર્ણન મુજબની આઇસર ગાડી આવતા તેને રોકી તેમાં તપાસ કરતા ચણાનાં ભુસાંની બોરીઓની આડમાં વિદેશી દારૂ તેમજ બીયરનો જથ્થો મળી આવ્યો હતો. પોલીસે રૂ. 41,85,670નો દારૂ અને આઇસર ગાડી, તેમજ પાયલોટિંગ કરનાર કાર મળી કુલ રૂ.54,52,880 નાં મુદ્દામાલ જપ્ત કરી પાંચ આરોપીઓ નારાયણ રામપ્રસાદ મીણા, નેનસિંગ દુલેસિંગ પવાર (બને રહે. મધ્ય પ્રદેશ), દલપત લક્ષ્મણ રાઠવા (રહે.મીઠીબોર, છોટાઉદેપુર), મહેશ અભેસિંગ પટેલ (અંતેલા, દેવગઢ બારીઆ)અને સુનીલ ગણપત રાઠવા(રહે. દામાવાવ, ઘોંઘબા)ની અટકાયત કરી હતી.