Dakor News: પવિત્ર ગોમતી તળાવના ઘાટ પર તાંત્રિક વિધિ કરાતો વીડિયો વાયરલ થતાં ભક્તોમાં ભારે રોષ

ખેડા જિલ્લામાં આવેલા સુપ્રસિદ્ધ યાત્રાધામ ડાકોરમાંથી શ્રદ્ધાળુઓની આસ્થાને ઠેસ પહોંચાડતી એક ચોંકાવનારી ઘટના સામે આવી છે. ડાકોરના પવિત્ર અને ઐતિહાસિક ગોમતી તળાવના ઘાટ પર એક પરિવાર દ્વારા કથિત રીતે તાંત્રિક વિધિ અને મેલી વિદ્યા કરવામાં આવતી હોવાનો વીડિયો સોશિયલ મીડિયા પર જોરદાર વાયરલ થઈ રહ્યો છે. પવિત્ર યાત્રાધામની આ પ્રકારે અવમાનના થવાને પગલે ડાકોરના ઠાકોરના ભક્તો અને સ્થાનિક રહીશોમાં તંત્ર સામે ભારે આક્રોશ જોવા મળી રહ્યો છે.

ગોમતી ઘાટ પર મેલી વિદ્યાની આશંકા

વાયરલ થયેલા વીડિયોમાં એક પરિવાર પવિત્ર ગોમતી તળાવના ઘાટ પર બેસીને કોઈ અગમ્ય હેતુસર તાંત્રિક પ્રક્રિયા કરતો સ્પષ્ટ જોઈ શકાય છે. ઘાટ પર જે પ્રકારની સામગ્રી અને ક્રિયાઓ કરવામાં આવી રહી છે, તેનાથી સ્થાનિકો અને દર્શનાર્થીઓમાં એવી પ્રબળ આશંકા સેવાઈ રહી છે કે આ કોઈ "મેલી વિદ્યા" અથવા તાંત્રિક વિધિનો ભાગ છે. ભગવાન રણછોડરાયના ચરણોમાં આવેલા આ પરમ પવિત્ર સ્થળે આવી અપવિત્ર પ્રવૃત્તિ થતાં જ આ મામલો સોશિયલ મીડિયા પર ભારે ચર્ચાનો વિષય બન્યો છે.

પવિત્ર તીર્થધામની ગરિમા લજવાઈ

ડાકોરનું ગોમતી તળાવ વર્ષો જૂનો ઇતિહાસ ધરાવે છે અને દેશભરમાંથી આવતા લાખો ભક્તોની શ્રદ્ધા આ સ્થાન સાથે જોડાયેલી છે. આવા પરમ પવિત્ર ઘાટ પર દિવસ-દહાડે કે રાત્રિના સમયે સુરક્ષા અને વહીવટી તંત્રની નજર બહાર આવી પ્રવૃત્તિઓ કેવી રીતે થઈ શકે, તેને લઈને અનેક સવાલો ઊભા થયા છે. આ ઘટનાને પગલે રોષે ભરાયેલા ભક્તો અને સ્થાનિક સંગઠનોએ યાત્રાધામની ગરિમાને નુકસાન પહોંચાડનારા શખ્સોને વહેલી તકે શોધી કાઢી તેમની સામે કાયદેસરના કડક પગલાં ભરવાની તેમજ ઘાટ પર સુરક્ષા વધારવાની તંત્ર પાસે ઉગ્ર માંગ કરી છે.

ગુજરાતના વધુ સમાચાર વાંચવા માટે ક્લિક કરો