Dabhoiના સેગુવાડા ગામે વરસાદી પાણીના નિકાલ મુદ્દે એક જ કોમના બે જૂથો વચ્ચે સશસ્ત્ર અથડામણ

વડોદરા જિલ્લાના ડભોઇ તાલુકામાંથી ચોમાસાની ઋતુ વચ્ચે જૂથ અથડામણની એક ચિંતાજનક ઘટના સામે આવી છે. ડભોઇના સેગુવાડા ગામે વરસાદી પાણીના નિકાલની જગ્યા બાબતે પડોશીઓ વચ્ચે વિવાદ સર્જાયો હતો. આ સામાન્ય વિવાદે જોતજોતામાં ઉગ્ર સ્વરૂપ ધારણ કરી લીધું હતું અને એક જ કોમના બે જૂથો સામસામે આવી ગયા હતા. બંને જૂથો વચ્ચે શાબ્દિક બોલાચાલી બાદ મામલો બિચક્યો હતો અને વાત લાકડીઓ તથા ધારદાર હથિયારોથી હુમલા સુધી પહોંચી ગઈ હતી.

પિતા-પુત્ર ઈજાગ્રસ્ત થતાં વડોદરા ખસેડાયા

આ હિંસક અથડામણ દરમિયાન એક જૂથ દ્વારા કરવામાં આવેલા હુમલામાં પિતા અને પુત્ર પર કાળો કેર વર્તાવવામાં આવ્યો હતો. હુમલાખોરોએ પિતા અને પુત્ર બંનેને લાકડીઓ અને અન્ય વસ્તુઓ વડે બેરહેમીપૂર્વક માર માર્યો હતો, જેના કારણે બંનેને માથાના તેમજ શરીરના અન્ય ભાગોમાં ગંભીર અને લોહીલુહાણ ઇજાઓ પહોંચી હતી. ઘટનાને પગલે ગામમાં ભારે અફરાતફરી મચી ગઈ હતી. ઇજાગ્રસ્ત પિતા-પુત્રની હાલત નાજુક જણાતા સ્થાનિકોએ તાત્કાલિક એમ્બ્યુલન્સને જાણ કરી હતી, જેના મારફતે બંનેને વધુ સઘન સારવાર અર્થે વડોદરાની એસ.એસ.જી. હોસ્પિટલ ખાતે ખસેડવામાં આવ્યા છે.

હુમલાખોરો વિરુદ્ધ ગુનો નોંધવાની તજવીજ

પાણીના નિકાલના સામાન્ય ઝઘડામાં આટલી મોટી અથડામણ થતાં જ ડભોઇ પોલીસનો કાફલો તાત્કાલિક સેગુવાડા ગામે દોડી આવ્યો હતો. પોલીસે ગામમાં શાંતિ જળવાઈ રહે અને મામલો વધુ ન વણસે તે માટે ચુસ્ત પોલીસ બંદોબસ્ત ગોઠવી દીધો છે. પોલીસે વડોદરા હોસ્પિટલ ખાતે સારવાર લઈ રહેલા પિતા-પુત્રની ફરિયાદ લેવાની અને હુમલો કરનારા સામે રાયોટિંગ તેમજ જાનથી મારી નાખવાના પ્રયાસ સહિતની કલમો હેઠળ ગુનો નોંધી આરોપીઓની ધરપકડ કરવાની કાયદેસરની તજવીજ હાથ ધરી છે.

ગુજરાતના વધુ સમાચાર વાંચવા માટે ક્લિક કરો