Chhota Udepur News: નસવાડી ગ્રામ પંચાયતમાં સભ્યોની ગાડીના કાચ તોડ્યા,ચૂંટણી અધિકારીને રૂમમાં પૂરી દીધા

નસવાડી જૂથ ગ્રામ પંચાયતમાં સરપંચ તડવી મેહુલ કુમાર પ્રકાશભાઈની કામગીરી સામે નારાજગી વ્યક્ત કરતાં પંચાયતના 12 સભ્યોએ અવિશ્વાસની દરખાસ્ત રજૂ કરવાની પ્રક્રિયા હાથ ધરી હતી. સભ્યોએ ગત 14 ઓક્ટોબરે તલાટીને લેખિત નોટિસ આપી નિયમ મુજબ ખાસ બેઠક બોલાવવાની માગ કરી હતી. સભ્યોએ આક્ષેપ કર્યો હતો કે સરપંચ દ્વારા સભ્યોને વિશ્વાસમાં લીધા વિના વહીવટી અને વિકાસલક્ષી નિર્ણયો લેવામાં આવે છે.સરકારી ગ્રાન્ટ, નાણાકીય હિસાબો અને વાર્ષિક અંદાજપત્ર અંગે સભ્યોને પૂરતી માહિતી આપવામાં આવતી નથી.ઉપરાંત 5 લાખની રકમ ડિપોઝિટ પેટે જમા કરાવવા સહિતના નાણાકીય વ્યવહારોમાં નિયમોનું પાલન ન થયું હોવાના પણ આક્ષેપો કરવામાં આવ્યા હતા. આ મામલે આજે મોટી બબાલ શરૂ થઈ હતી. 

વિવાદે જોતજોતામાં ઉગ્ર સ્વરૂપ ધારણ કરી લીધું 

છોટાઉદેપુર જિલ્લાના નસવાડી ખાતે આવેલી ગ્રામ પંચાયતમાં સ્થાનિક રાજકીય ગતિવિધિઓ વચ્ચે અચાનક ભારે ઉત્તેજના ફેલાઈ ગઈ હતી.નસવાડી ગ્રામ પંચાયતના વર્તમાન સરપંચ સામે સભ્યો દ્વારા અવિશ્વાસની દરખાસ્ત રજૂ કરવામાં આવી હતી.આ અવિશ્વાસની દરખાસ્ત અંગે નિર્ણય કરવા માટે પંચાયત કચેરી ખાતે એક મહત્વપૂર્ણ મિટિંગનું આયોજન કરવામાં આવ્યું હતું.જોકે આ નિયત મિટિંગ વિધિવત રીતે શરૂ થાય તે પૂર્વે જ માહોલ તંગ બની ગયો હતો.પંચાયતના સભ્યો મિટિંગમાં ભાગ લેવા માટે ગ્રામ પંચાયત પરિસરમાં આવી પહોંચ્યા કે તરત જ ત્યાં ભારે હોબાળો અને વિરોધ શરૂ થઈ ગયો હતો.સભ્યોના આગમનની સાથે જ શરૂ થયેલા આ વિવાદે જોતજોતામાં ઉગ્ર સ્વરૂપ ધારણ કરી લીધું હતું.

સભ્યોની એ ગાડીના કાચ તોડી નાખવામાં આવ્યા

પરિસ્થિતિ એટલી હદે વણસી ગઈ હતી કે ત્યાં તોડફોડ પણ આચરવામાં આવી હતી.પંચાયતના સભ્યો જે ગાડીમાં સવાર થઈને મિટિંગમાં આવ્યા હતા તે ગાડીને સીધી રીતે નિશાન બનાવવામાં આવી હતી.સભ્યોની એ ગાડીના કાચ તોડી નાખવામાં આવ્યા હતા.વાહનમાં થયેલી તોડફોડને પગલે પંચાયત કચેરી બહાર ભય અને અરાજકતાનો માહોલ છવાઈ ગયો હતો.ગાડીના કાચ તૂટવાની ઘટનાથી સમગ્ર પરિસરમાં તણાવ ચરમસીમાએ પહોંચી ગયો હતો.બબાલ માત્ર બહાર તોડફોડ સુધી સીમિત ન રહેતાં પંચાયત ભવનની અંદર પણ ગંભીર પરિસ્થિતિ ઊભી થઈ હતી.મિટિંગની પ્રક્રિયા માટે આવેલા ચૂંટણી અધિકારીને પણ ગ્રામ પંચાયતની અંદર પૂરી દેવામાં આવ્યા હતા.આ ઉપરાંત પંચાયતના કેટલાક સભ્યોને પણ પંચાયત કાર્યાલયની અંદર જ લોક કરી દેવાયા હતા.અધિકારી તેમજ સભ્યોને બંધક બનાવી દેવાતાં સ્થિતિ ચિંતાજનક બની ગઈ હતી.સરપંચ સામેની અવિશ્વાસની દરખાસ્તને લઈને સર્જાયેલા આ ઘટનાક્રમથી નસવાડીનું વાતાવરણ અત્યંત ગરમાઈ ગયું છે.

આ પણ વાંચોઃ Chhota udepur : નસવાડી ગ્રા.પંચાયતમાં સરપંચ સામે અવિશ્વાસની દરખાસ્ત