Banaskantha જિલ્લા પ્રાથમિક શિક્ષણ સંઘ ધિરાણ મંડળીમાં ભ્રષ્ટાચારના ગંભીર આક્ષેપો સાથે રજુઆત

બનાસકાંઠા જિલ્લામાં આવેલી જિલ્લા પ્રાથમિક શિક્ષણ સંઘ ધિરાણ મંડળી હાલમાં ગંભીર ભ્રષ્ટાચારના આક્ષેપોને કારણે વિવાદના ચકડોળે ચડી છે. મંડળીના જ સભ્યોએ ભ્રષ્ટાચારના આક્ષેપો સાથે એક બેઠક યોજીને જિલ્લા કલેક્ટર સમક્ષ આવેદનપત્ર પાઠવીને સઘન તપાસની માંગ કરી છે.

સાધારણ સભા ન બોલાવવાનો મુખ્ય આક્ષેપ

મંડળીના સભ્યો દ્વારા કરવામાં આવેલા મુખ્ય આક્ષેપો પૈકી એક એ છે કે મંડળીના આગેવાનો દ્વારા મંડળીમાં મોટા પાયે ભ્રષ્ટાચાર આચરવામાં આવ્યો છે અને આ ભ્રષ્ટાચારને છુપાવવા માટે તેઓ સાધારણ સભા બોલાવતા નથી. સભ્યોનો દાવો છે કે જો સાધારણ સભા બોલાવવામાં આવે તો મંડળીના હિસાબો અને નાણાકીય ગેરરીતિઓનો પર્દાફાશ થઈ શકે છે. મંડળીના સભ્યોએ એકઠા થઈને જિલ્લા કલેક્ટરને આવેદનપત્ર પાઠવ્યું છે અને આ સમગ્ર મામલે નિષ્પક્ષ તપાસ હાથ ધરવામાં આવે તેવી ભારપૂર્વક માંગણી કરી છે.

ન્યાય નહીં મળે તો ઉગ્ર આંદોલનની ચીમકી 

ભ્રષ્ટાચારના આક્ષેપો કરનારા સભ્યોએ સ્પષ્ટ ચેતવણી આપી છે કે જો જિલ્લા કલેક્ટર દ્વારા આ મામલે તાત્કાલિક અને યોગ્ય તપાસ શરૂ કરવામાં નહીં આવે અને તેમને ન્યાય નહીં મળે તો તેઓ ઉગ્ર આંદોલન કરવા માટે મજબૂર થશે. પ્રાથમિક શિક્ષણ સંઘ ધિરાણ મંડળીમાં થયેલા કથિત ભ્રષ્ટાચારના આક્ષેપોને કારણે જિલ્લાના પ્રાથમિક શિક્ષણ સંઘ ધિરાણ મંડળીમાં ભારે ચકચાર મચી જવા પામી છે.