Ahmedabad : રોકાણ સામે ઉંચા વળતરની લાલચ આપીને કરોડો રૂપીયાનું ફુલેકું ફેરવનાર ગઠિયો ઝડપાયો

અમદાવાદના વેપારીઓને રોકાણ સામે ઉંચા વળતરની લાલચ આપીને કરોડો રૂપીયાનું ફુલેકું ફેરવનાર ગઠિયાની રામોલ પોલીસે ધરપકડ કરી છે. તેણે બચત મંડળી અને કન્સ્ટ્રક્શન સાઇટમાં રોકાણ કરવાના બહાને લોકો પાસેથી રૂપીયા પડાવ્યા હતાં. મામા ભાણેજની જોડીએ આ ઠગાઇ કરતા લોકોમાં રોષ જોવા મળ્યો છે. છેતરપિંડીનો આંકડો હજી પણ વધે તેવી શક્યતા છે..

પોલીસે મહેશ જૈન નામના આરોપીની ધરપકડ કરી

પોલીસે મહેશ જૈન નામના આરોપીની ધરપકડ કરી છે. મેડીકલ સ્ટોર ધરાવતા મહેશ જૈને તેના ભાઇ નવીન જૈન અને ભાણીયા શુભમ જૈન સાથે મળીને શોર્ટકટથી રૂપીયા કમાવવા વેપારીઓને ટાર્ગેટ કર્યા હતા. મામા ભાણેજની ત્રિપુટીએ સગા સંબંધીઓને અલગ અલગ બહાના હેઠળ રોકાણ કરાવીને ઉંચું વળતર આપવાની લાલચ આપીને લોકો પાસેથી કરોડો રૂપીયા ખંખેરી લીધા છે..

 મોટાભાગે નજીકના સંબંધીઓને જ ટાર્ગેટ બનાવ્યા

આ ઠગ ટોળકીએ મોટાભાગે નજીકના સંબંધીઓને જ ટાર્ગેટ બનાવ્યા છે.બચત મંડળી, જૈન કેપીટલ નામની પેઢી સહિત અન્ય સંસ્થામાં રોકાણ કરાવી ઉંચુ વળતર આપવાનું કહીને 16 લોકો પાસેથી 5.42 કરોડ રૂપીયા પડાવીને છેતરપિંડી આચરી છે. આરોપીઓએ હજી પણ અનેક લોકો પાસેથી રૂપીયા પડાવ્યા હોવાની પોલીસને આશંકા છે. પોલીસે સમગ્ર કૌભાંડના માસ્ટર માઇન્ડ એવા મહેશ જૈનની ધરપકડ કરીને વધુ તપાસ શરૂ કરી છે.  વધુ નફો મળશે તેમ કહીને લોકો પાસે રોકાણ કરાવતો

પકડાયેલ આરોપી મહેશ જૈન મણીનગરમાં મેડીકલ સ્ટોર ધરાવે છે..જ્યારે તેણે અલગ અલગ કન્સ્ટ્રક્શન સાઇટો શરૂ કરી છે. જ્યાં રોકાણ કરવાથી વધુ નફો મળશે તેમ કહીને લોકો પાસે રોકાણ કરાવતો હતો અને કરોડો રૂપીયા લઇ રફુચક્કર થઇ ગયો હતો. આરોપી બચત મંડળી, મહેશ મેડીકલ, જૈન કેપીટલ અને દિશા એન્ટર પ્રાઇઝ નામની પેઢીમાં લોકો પાસે રોકાણ કરાવતો હતો. આરોપીએ મે 2024થી લોકો પાસેથી રૂપીયા પડાવ્યા હોવાનું પોલીસ તપાસમાં સામે આવ્યું છે..જો કે ત્રિપુટીએ છેતરપિંડી આચરીને એકઠા કરેલા રૂપીયાનો ઉપયોગ ક્યાં ક્યા કર્યો છે તે અંગે પોલીસએ તપાસ શરૂ કરી છે.  બે ફરાર આરોપી નવીન જૈન અને શુભમ જૈનને પકડવા માટેની તજવીજ

હાલમાં પોલીસે મહેશ જૈનની ધરપકડ કરીને વધુ પૂછપરછ શરૂ કરી છે..જ્યારે અન્ય બે ફરાર આરોપી નવીન જૈન અને શુભમ જૈનને પકડવા માટેની તજવીજ શરૂ કરી છે..આરોપીઓએ આ સિવાય પણ અનેક લોકો પાસેથી રૂપીયા પડાવ્યા હોવાની પોલીસને આશંકા છે.જેથી છેતરપિંડીનો આંકડો હજી પણ વધી શકે તેવી શક્યતા છે..