Banaskantha News: હાથમાં ચંપલ અને માથા પર દફ્તર મુકીને બાળકો નદીના ધસમસતા પ્રવાહમાં પસાર થઈ સ્કૂલે જાય છે

સમગ્ર દેશમાં ગુજરાત મોડેલની અનેક ચર્ચાઓ થઈ રહી છે. રાજ્યમાં વિકાસની વાતો ખૂબ થાય છે. રાજ્યમાં કામ કરતી ડબલ એન્જિનની સરકાર છે. ત્યારે શિક્ષણનો પ્રશ્ન હજી પણ ચર્ચાના કેન્દ્રમાં છે. રાજ્યના સરહદી જિલ્લા બનાસકાંઠાના અમીરગઢમાં વિકાસની વાસ્તવિકતા સામે આવી છે. ભણવા માટે નાના બાળકો નદી પાર કરીને સ્કૂલે જવા મજબૂર બન્યાં છે. નદીના ધસમસતા પાણીના પ્રવાહ વચ્ચેથી બાળકો સ્કૂલમાં ભણવા જઈ રહ્યાં છે.

કાકવાડા ગામના બાળકો નદીમાંથી પસાર થવા મજૂબર

બનાસકાંઠા જિલ્લાના અમીરગઢમાં વિકાસની વાસ્તવિકતા સામે આવી છે. અમીરગઢના કાકવાડા ગામના બાળકોને ભણવું છે પણ ભણવા માટે નદીનો ધસમસતો પ્રવાહ ચાલીને પસાર કરવો પડે તેવી સ્થિતિ સર્જાઈ છે. નદીમાંથી ચાલીને ભીના કપડે સ્કૂલમાં જતા બાળકોનો વીડિયો સામે આવ્યો છે. હાથમાં ચંપલ અને માથા પર સ્કૂલ બેગ લઈને બાળકો શાળામાં ભણવા જઈ રહ્યાં છે. વરસાદની સિઝનમાં નદીનો પ્રવાહ ખૂબજ ભયાનક હોય છે ત્યારે બાળકોને ભણવા માટે મોટી મુશ્કેલીઓ પાર કરવી પડે તેવી સ્થિતિ છે.

બે વખત બ્રિજ મંજૂર થયો પણ હજુ સુધી બન્યો નથી

બનાસકાંઠાનું તંત્ર ભલે સબ સલામત હોવાના બણગા ફૂંકતુ હોય પણ વાસ્તવિકતા કંઈક જુદી જ છે. સરકારની શિક્ષણ માટેની વાતો પણ અહીં પોકળ સાબિત થઈ હોય તેવું લાગી રહ્યું છે. અહીં બે વખત બ્રિજ મંજૂર કરવામાં આવ્યો છે પરંતુ હજી સુધી બ્રિજ બની શક્યો નથી. બ્રિજનું વારંવાર ભૂમિપૂજન પણ થાય છે પરંતુ કામ શરૂ થતુ નથી. જેના કારણે ગામના લોકોને મોટી હાલાકીનો સામનો કરવો પડે છે.