Anand News: બાળકીના હત્યારાનો પોલીસ પર કાયરતાપૂર્ણ હુમલો, ખબરઅંતર પૂછવા પહોંચ્યા ગૃહ રાજ્યમંત્રી હર્ષ સંઘવી

Anand News: બાળકીના હત્યારાનો પોલીસ પર કાયરતાપૂર્ણ હુમલો, ખબરઅંતર પૂછવા પહોંચ્યા ગૃહ રાજ્યમંત્રી હર્ષ સંઘવી

આણંદ જિલ્લાના એક ગામમાં માસૂમ ચાર વર્ષની બાળકી પર અપહરણ, દુષ્કર્મ અને નિર્મમ હત્યા આચરનાર નરાધમ આરોપીએ પોલીસ કસ્ટડી દરમિયાન ભાગવાનો હીન પ્રયાસ કર્યો હતો. તપાસ અર્થે લઈ જવાતી વખતે આરોપીએ અચાનક ઉલ્ટી થતી હોવાનું બહાનું બતાવી પોલીસ વાહન ઊભું રખાવ્યું હતું. વાહન ઊભું રહેતાં જ શાતિર આરોપીએ તકનો લાભ ઉઠાવીને પોતાની પાસે છુપાવેલા ચપ્પુ વડે ફરજ પરના પોલીસ કર્મચારી પર અચાનક જાનલેવા હુમલો કરી દીધો હતો. આ ઘટનાથી પોલીસ બેડા સહિત સમગ્ર વિસ્તારમાં ભારે સસનાટી મચી ગઈ છે.

કરમસદની ક્રિષ્ના હોસ્પિટલમાં સારવાર હેઠળ પોલીસકર્મી

આરોપીના આ અચાનક થયેલા હુમલામાં ઈજાગ્રસ્ત થયેલા પોલીસ કર્મચારીને તુરંત જ સારવાર અર્થે કરમસદ સ્થિત જાણીતી ક્રિષ્ના હોસ્પિટલમાં ખસેડવામાં આવ્યા હતા. હોસ્પિટલના તબીબોની ટીમ દ્વારા તેમની સઘન સારવાર શરૂ કરવામાં આવી છે. ફરજ દરમિયાન પોતાના જીવના જોખમે ક્રૂર આરોપીનો સામનો કરનાર બહાદુર પોલીસકર્મીની સ્થિતિ પર સતત નજર રાખવામાં આવી રહી છે, અને હોસ્પિટલ તંત્ર દ્વારા જરૂરી તમામ તબીબી સહાય પૂરી પાડવામાં આવી રહી છે.

ગૃહ રાજ્યમંત્રી હર્ષ સંઘવીએ લીધી હોસ્પિટલની મુલાકાત

ઘટનાની ગંભીરતાને ધ્યાને રાખીને ગુજરાતના ગૃહ રાજ્યમંત્રી શ્રી હર્ષ સંઘવી તાત્કાલિક અસરથી કરમસદની ક્રિષ્ના હોસ્પિટલ પહોંચ્યા હતા. તેમણે ઈજાગ્રસ્ત પોલીસકર્મીના ખબરઅંતર પૂછ્યા હતા અને તેમના પરિવારજનોને સાંત્વના આપતાં સરકાર વતી પૂરેપૂરા સાથ-સહકારની ખાતરી આપી હતી. મંત્રીશ્રીએ તબીબો સાથે પણ વાતચીત કરીને શ્રેષ્ઠ સારવાર આપવાની સૂચના આપી હતી. આ સાથે જ તેમણે સ્પષ્ટ શબ્દોમાં જણાવ્યું હતું કે કાયદો પોતાના હાથમાં લેનારા અને માસૂમ પર અત્યાચાર ગુજારનારા ગુનેગારો સામે આકરી કાર્યવાહી કરવામાં આવશે.

ગુજરાતના વધુ સમાચાર વાંચવા માટે ક્લિક કરો