Ahmedabadના દર્પણ ચાર રસ્તા પાસે સરેઆમ ગુંડાગીરી: આધેડને 12 સેકન્ડમાં લાકડીના 9 ફટકા માર્યા

અમદાવાદ શહેરના પોશ ગણાતા પશ્ચિમ વિસ્તારમાંથી કાયદો અને વ્યવસ્થાની સ્થિતિ સામે સવાલો ઉઠાવતી એક ચોંકાવનારી ઘટના સામે આવી છે. શહેરના નવરંગપુરા વિસ્તારમાં આવેલા દર્પણ ચાર રસ્તા પાસે એક આધેડ વયના વ્યક્તિ પર જાહેર રોડ પર અત્યંત ક્રૂરતાપૂર્વક હુમલો કરવામાં આવ્યો હોવાનો કિસ્સો પ્રકાશમાં આવ્યો છે. એક માથાભારે શખ્સ દ્વારા આધેડને રસ્તાની વચ્ચોવચ બેફામ રીતે માર મારવામાં આવી રહ્યો હોવાનો એક જીવંત વીડિયો સોશિયલ મીડિયા પર વાયરલ થયો છે, જેને જોઈને સમગ્ર શહેરમાં ચકચાર મચી ગઈ છે.

માત્ર 12 સેકન્ડમાં લાકડીના 9 ફટકા ઝીંકી દીધા

વાયરલ થઈ રહેલા આ વીડિયોમાં હુમલાખીરની ભયાનકતા અને ક્રૂરતા સ્પષ્ટપણે જોઈ શકાય છે. હુમલાખોર શખ્સે ક્રોધે ભરાઈને માત્ર 12 સેકન્ડના અત્યંત ટૂંકા ગાળામાં આધેડના શરીર પર લાકડીના એક પછી એક 9 જેટલા આકરા ફટકા ઝીંકી દીધા હતા. પ્રાથમિક અનુમાન મુજબ, આ ચકચારી ઘટના ગત 27 જૂનના રોજ બની હોવાનું ચર્ચાઈ રહ્યું છે. રસ્તા પર વાહન ચલાવવા અથવા ગાળો બોલવા જેવી સામાન્ય બાબતે બંને વચ્ચે ઉગ્ર ઝઘડો અને માથાકૂટ થઈ હતી, જે બાદમાં આટલી હિંસક અથડામણમાં ફેરવાઈ ગઈ હતી. આસપાસ લોકોની હાજરી હોવા છતાં હુમલાખોર બેખોફ બનીને લાકડી ફટકારતો રહ્યો હતો.

પોલીસે ફરિયાદ નોંધવા તજવીજ હાથ ધરી

આ ઘટનાનો વીડિયો વાયરલ થતાં જ સ્થાનિક ગુજરાત યુનિવર્સિટી પોલીસ સ્ટેશનની ટીમ હરકતમાં આવી હતી. પોલીસે ગુનાની ગંભીરતાને સમજીને વાયરલ વીડિયોના આધારે તપાસના ચક્રો ગતિમાન કર્યા છે. પોલીસે ભોગ બનનાર પીડિતની ઓળખ કરીને તેમનો રૂબરૂ સંપર્ક સાધ્યો હતો અને કાયદેસરની ફરિયાદ નોંધાવવા માટે પ્રયાસો કર્યા હતા. જો કે, અત્યાર સુધીના અહેવાલો અનુસાર, આધેડે કોઈ અગમ્ય કારણોસર કે ડરના માર્યા હજુ સુધી પોલીસમાં સત્તાવાર ફરિયાદ નોંધાવી નથી. તેમ છતાં, પોલીસે જાહેર રોડ પર ન્યુસન્સ ફેલાવનારા આરોપીને ઝડપી પાડવા કાર્યવાહી તેજ કરી છે.

ગુજરાતના વધુ સમાચાર વાંચવા માટે ક્લિક કરો