Ahmedabadના ઢાલગરવાડમાં દુકાનમાં ઘૂસી ધમાલ! જૂની અદાવતમાં 5 શખ્સોનો હુમલો, મારામારી-તોડફોડ CCTVમાં કેદ

અમદાવાદ શહેરના અતિ વ્યસ્ત અને જાણીતા ઢાલગરવાડ વિસ્તારમાં અગાઉ થયેલા ઝઘડાની અદાવતમાં એક કાપડની દુકાનમાં ઘૂસીને લોહીયાળ મારામારી અને તોડફોડ કરવાની ગંભીર ઘટના સામે આવી છે. અમાન નામના યુવક સાથે પૂર્વે થયેલા મનદુઃખ અને તકરારનો બદલો લેવા માટે પાંચ જેટલા શખ્સો હથિયારો સાથે દુકાનમાં ધસી આવ્યા હતા. આ મામલે ઇરફાન વલીભાઈ ઘાંચી, રિયાજ વારીશ નૂર એહમદ શેખ, નૂર મોહમદ અબ્દુલ રશીદ શેખ, ઇરફાન યાસીનભાઈ શેખ અને ઇકબાલ યાસીનભાઈ શેખ સહિતના પાંચ નામજોગ શખ્સો સામે પોલીસ ફરિયાદ નોંધાવવામાં આવી છે.

પિતા-પુત્ર સહિત ચાર ઇજાગ્રસ્ત, સમગ્ર ઘટના CCTV કેમેરામાં કેદ

આ હુમલા દરમિયાન આરોપીઓએ અમાનને માર મારવાનું શરૂ કર્યું હતું. અમાનને છોડાવવા માટે વચ્ચે પડેલા તેના કાકા મોહમંદ અમીન અને પિતા આકીલને પણ હુમલાખોરોએ છોડ્યા ન હતા અને તેમને પણ બેફામ માર માર્યો હતો. આ હિંસક અથડામણમાં અમીન મન્સુરી, અમાન, આકીલ અને ઝહીર મન્સુરીને ગંભીર ઈજાઓ પહોંચી હતી. ત્યારબાદ અન્ય સાત જેટલા અજાણ્યા શખ્સો પણ ત્યાં પહોંચી ગયા હતા અને દુકાનમાં ભારે તોડફોડ કરી નુકસાન પહોંચાડ્યું હતું. એટલું જ નહીં, આરોપીઓએ છરી બતાવીને જાનથી મારી નાખવાની ધમકી પણ આપી હતી. આ સમગ્ર ઘટના દુકાનમાં લાગેલા સીસીટીવી (CCTV) કેમેરામાં સ્પષ્ટપણે કેદ થઈ ગઈ છે.

ઇજાગ્રસ્તો SVP હોસ્પિટલમાં દાખલ, કારંજ પોલીસે હાથ ધરી તપાસ

ઘટનાની ગંભીરતાને ધ્યાનમાં રાખીને તમામ ઇજાગ્રસ્તોને તાત્કાલિક ધોરણે સારવાર માટે એસવીપી (SVP) હોસ્પિટલ ખાતે ખસેડવામાં આવ્યા હતા, જ્યાં તેમની સારવાર ચાલી રહી છે. બનાવની જાણ થતાં જ કારંજ પોલીસ મથકનો કાફલો તાત્કાલિક ઘટનાસ્થળે અને હોસ્પિટલ પહોંચી ગયો હતો. પોલીસે ઇજાગ્રસ્તોની ફરિયાદના આધારે પાંચ નામજોગ તેમજ અન્ય સાત અજાણ્યા શખ્સો સામે ગુનો નોંધીને વાઇરલ થયેલા સીસીટીવી ફૂટેજના આધારે આરોપીઓની ધરપકડ કરવા માટેની કાયદેસરની તજવીજ હાથ ધરી છે.

આ પણ વાંચો : Gujarat News: પક્ષ પલટુઓની સંપત્તિ ચકાસો, MLA અને MPની કામગીરીના વાર્ષિક અહેવાલ જાહેર થવા જોઈએ