Ahmedabad:દેવભૂમિ દ્વારકામાં સરકારી કચેરી સામે ધરણાં પર પ્રતિબંધને હાઈકોર્ટમાં પડકાર

દેવભૂમિ દ્વારકા જિલ્લામાં સરકારી કચેરીઓ સામે રેલી, પ્રદર્શન, ધરણાં કે ઉપવાસ સહિતના કાર્યક્રમો યોજવા પર પ્રતિબંધ ફરમાવતા સ્થાનિક એડિશનલ ડિસ્ટ્રિક્ટ મેજિસ્ટ્રેટ દ્વારા જારી કરાયેલા જાહેરનામાની કાયેદસરતાને પડકારતી રિટ અરજી ગુજરાત હાઇકોર્ટમાં દાખલ થઇ છે.

ખેડૂત આગેવાન દ્વારા કરવામાં આવેલી આ રિટ અરજીની સુનાવણી આગામી દિવસોમાં હાથ ધરાશે. અરજદાર દ્વારા રિટ અરજીમાં એ મતલબના મુદ્દા ઉપસ્થિત કરવામાં આવ્યા છે કે, દેવભૂમિ દ્વારકાના એડિશનલ ડિસ્ટ્રીક્ટ મેજિસ્ટ્રેટ દ્વારા જારી કરાયેલું ઉપરોકત જાહેરનામું ગેરકાયદે, ગેરબંધારણીય અને અયોગ્ય હોઇ રદબાતલ થવાપાત્ર છે. આ જાહેરનામા મુજબ, દેવભૂમિ દ્વારકા જિલ્લામાં સરકારી કચેરીઓ સામે રેલી, પ્રદર્શન, ધરણાં કે, ઉપવાસ જેવા કાર્યક્રમો યોજવા પર પ્રતિબંધ ફરમાવાયો છે. આ જાહેરનામાની મુદત તા.3-4-2026 સુધીની જાહેર કરાઇ છે. દેવભૂમિ દ્વારકાની તમામ સરકારી કચેરીઓની 100 મીટરની ત્રિજયામા ધરણાં, પ્રદર્શન કે રેલી યોજવા ચાર કરતાં વધુ લોકોને એકત્રિત થવા પર પાબંદી ફરમાવાઇ છે, જે બિલકુલ ગેરકાયદે અને ગેરબંધારણીય વાત છે.