Ahmedabad News : વિદેશમાં ગુજરાતી સંસ્કૃતિનો જયજયકાર, લંડનની બ્રિટિશ પાર્લામેન્ટમાં અમદાવાદી 'પાઘડી મેન'નું ભવ્ય સન્માન...

સાત સમુંદર પાર વિદેશની ધરતી પર ફરી એકવાર ગુજરાતી સંસ્કૃતિ અને સાંસ્કૃતિક વારસાનો દબદબો જોવા મળ્યો છે. નવરાત્રિના પવિત્ર પર્વ દરમિયાન લંડનની ઐતિહાસિક બ્રિટિશ પાર્લામેન્ટ ખાતે યોજાયેલા વિશેષ કાર્યક્રમમાં અમદાવાદના રહેવાસી અને 'પાઘડી મેન' તરીકે દેશ-વિદેશમાં ખ્યાતિ પામેલા અનુજ મુદલિયારનું ભવ્ય સન્માન કરવામાં આવ્યું છે. ગુજરાતી પરંપરાગત પાઘડી કળાને આંતરરાષ્ટ્રીય સ્તરે ઓળખ અપાવવા બદલ તેમને આ ગૌરવવંતું બહુમાન પ્રાપ્ત થયું છે.

વર્લ્ડ બુક ઑફ રેકોર્ડ્સનો પ્રતિષ્ઠિત એવોર્ડ એનાયત

અમદાવાદમાં રહેતા અનુજ મુદલિયારને તેમની અનોખી પાઘડી બાંધવાની અને તેને કળા તરીકે પ્રમોટ કરવાની વિશેષ સિદ્ધિ બદલ 'વર્લ્ડ બુક ઑફ રેકોર્ડ્સ' (World Book of Records) નો એવોર્ડ પણ એનાયત કરવામાં આવ્યો છે. બ્રિટિશ પાર્લામેન્ટમાં ઉપસ્થિત અનેક આંતરરાષ્ટ્રીય નેતાઓ, સાંસદો અને ભારતીય સમુદાયના અગ્રણીઓની હાજરીમાં આ એવોર્ડ આપવામાં આવ્યો હતો. આ ક્ષણે સમગ્ર લંડનમાં 'પાઘડી મેન'નો જલવો જોવા મળ્યો હતો અને દરેક ભારતીયનું શિર ગર્વથી ઊંચું થઈ ગયું હતું.

નવરાત્રિમાં ગુજરાતી પાઘડી મેન છવાયા

નવરાત્રિ ઉત્સવની ઉજવણી વચ્ચે બ્રિટનમાં ગુજરાતી પહેરવેશ અને ખાસ કરીને પાઘડીનું મહત્વ લોકો સમક્ષ રજૂ કરીને અનુજ મુદલિયારે ભારતીય વારસાને નવી ઊંચાઈ આપી છે. તેમણે ગુજરાતની વિવિધ પ્રદેશ આધારિત પરંપરાગત પાઘડીઓને વૈશ્વિક મંચ પર રજૂ કરવાનું ભગીરથ કાર્ય કર્યું છે. બ્રિટનમાં થયેલા આ સન્માન બાદ અમદાવાદ સહિત સમગ્ર ગુજરાતમાં ખુશીનો માહોલ છે અને અનુજ મુદલિયાર પર શુભેચ્છાઓનો વરસાદ થઈ રહ્યો છે.

આ પણ વાંચો : Suratના સચિનમાં 21 વીઘા જમીન કૌભાંડનો પર્દાફાશ, બહેનોની ખોટી સહીઓ કરી જમીન હડપનારા ઝડપાયા!