Ahmedabad News : વસ્ત્રાપુરમાં સાસરીયાના ત્રાસથી પરિણીતાનો આપઘાત, મૃતદેહ હોસ્પિટલ મૂકી પતિ ફરાર

અમદાવાદના વસ્ત્રાપુર વિસ્તારમાં એક પરિણીતાએ આપઘાત કરી લેતા ચકચાર મચી ગઈ છે. મૃતક પરિણીતાના પરિવારજનોએ સાસરી પક્ષના સભ્યો પર ગંભીર આક્ષેપો કર્યા છે. પરિવારનું કહેવું છે કે પરિણીતાએ સાસરીયાના ત્રાસથી કંટાળીને આત્મહત્યાનું પગલું ભર્યું છે. આ બનાવ બાદ મૃતદેહને હોસ્પિટલમાં મૂકી દેવામાં આવ્યો હોવાનો પણ ગંભીર આરોપ છે, જેણે કેસમાં સંવેદનહીનતાનો નવો વળાંક આપ્યો છે.

પતિ દ્વારા 8-9 લાખ રૂપિયા લીધાનો આક્ષેપ

મૃતકના પરિજનોએ પતિ પર વધુ એક ગંભીર આક્ષેપ કર્યો છે કે, મૃતકના પતિએ તેમની પાસેથી 8-9 લાખ રૂપિયાની મોટી રકમ લીધી હતી. આ આર્થિક લેતીદેતી અને સાસરી પક્ષના ત્રાસને કારણે પરિણીતાએ જીવન ટૂંકાવ્યું હોવાનું પરિવાર માની રહ્યો છે. આપઘાત બાદ મૃતકના પતિએ સંવેદનહીનતા દાખવીને મૃતદેહને હોસ્પિટલમાં મૂકી દીધો હોવાનો આરોપ છે, જેના કારણે પરિવારમાં રોષની લાગણી ફેલાઈ છે અને જવાબદારો સામે કડક કાર્યવાહીની માંગણી ઉગ્ર બની છે.

આરોપી ન પકડાય ત્યાં સુધી મૃતદેહ સ્વીકારવાનો ઈન્કાર

પરિણીતાના પરિવારજનોએ આ સમગ્ર મામલે આરોપીઓ સામે કડકમાં કડક કાર્યવાહી કરવાની માગ કરી છે. તેમણે પોલીસ અને તંત્રને સ્પષ્ટ ચિમકી આપી છે કે, જ્યાં સુધી આ કેસના જવાબદાર આરોપીઓની ધરપકડ કરવામાં નહીં આવે અને તેમને ન્યાય નહીં મળે, ત્યાં સુધી તેઓ મૃતદેહ સ્વીકારશે નહીં. પરિવારજનોની આ ન્યાય માટેની લડતને કારણે વસ્ત્રાપુર પોલીસ સ્ટેશન ખાતે ભારે તંગદિલીનો માહોલ સર્જાયો છે અને પોલીસ પર ત્વરિત કાર્યવાહીનું દબાણ વધ્યું છે.