Bharuch News : ખેડૂતો માટે પડ્યા પર પાટું જેવી સ્થિતિ, 'જૂનું વળતર મળ્યું નથી, ત્યાં નવા માવઠાએ મોઢાનો કોળિયો છીનવ્યો'

ભરૂચ જિલ્લાના જંબુસર તાલુકામાં તાજેતરમાં પડેલા કમોસમી વરસાદ (માવઠા)ને કારણે ખેડૂતોને ડાંગરના પાકમાં મોટાપાયે નુકસાન થયું છે. જંબુસર સહિત પિલુદરા, કારેલી અને મહાપુરા જેવા અનેક ગામોમાં વરસાદનું પાણી ખેતરોમાં ભરાઈ જતાં ડાંગરનો તૈયાર પાક સંપૂર્ણપણે નિષ્ફળ ગયો છે. ખેડૂતો ભારે દુઃખની લાગણી વ્યક્ત કરી રહ્યા છે, કારણ કે તેમના મોંમાં આવેલો કોળિયો કુદરતે છીનવી લીધો છે. પાકને બચાવવાના છેલ્લા પ્રયાસરૂપે, ઘણા ખેડૂતોએ મશીનો લગાવીને ખેતરોમાંથી પાણી બહાર કાઢવાના ભગીરથ પ્રયત્નો કર્યા હતા, પરંતુ વરસાદનું પ્રમાણ વધુ હોવાથી તેમના આ પ્રયાસો પણ નિષ્ફળ નીવડ્યા છે. ખેડૂતોની આર્થિક સ્થિતિ અત્યંત દયનીય બની છે.

પાણીમાં મહેનત અને સહાય ન મળવાનો આક્ષેપ

જંબુસરના અસરગ્રસ્ત ખેડૂતોની મુખ્ય માંગ છે કે તેમની વેદના રાજ્ય સરકાર સાંભળે અને તાત્કાલિક યોગ્ય સહાય આપે. આ વિસ્તારના ખેડૂતોનો સીધો આક્ષેપ છે કે, સરકાર દ્વારા અવારનવાર આ વિસ્તારના ખેડૂતોને સમયસર સહાય આપવામાં આવતી નથી. ખેડૂતોએ તેમની આ વેદના અને રોષને વાચા આપતાં જણાવ્યું છે કે, એક તરફ કુદરતી આફતથી નુકસાન થાય છે અને બીજી તરફ સરકાર તરફથી મળવાપાત્ર સહાય પણ મળતી નથી, જેના કારણે તેઓ બેવડા મારનો ભોગ બની રહ્યા છે. ખેડૂતોએ સત્વરે સર્વે કરીને યોગ્ય વળતર ચૂકવવાની માંગણી કરી છે.

ભૂતકાળનું નુકસાન, ભવિષ્યની ચિંતા

ખેડૂતોની મુશ્કેલી માત્ર આ વખતના કમોસમી વરસાદ પૂરતી સીમિત નથી. ખેડૂતોના જણાવ્યા અનુસાર, અગાઉ પણ ચોમાસામાં વરસેલા વરસાદમાં આ વિસ્તારના ખેડૂતોને મોટું નુકસાન થયું હતું. દુર્ભાગ્યની વાત એ છે કે, તે સમયના નુકસાનની સહાય પણ હજુ સુધી ખેડૂતોને ચૂકવવામાં આવી નથી. આ પૂર્વ અનુભવના કારણે ખેડૂતોમાં રાજ્ય સરકાર પરનો વિશ્વાસ ઘટી રહ્યો છે. તૈયાર પાક ગુમાવવાની પીડાની સાથે, ભૂતકાળની બાકી સહાયની અનિશ્ચિતતાએ ખેડૂતોની ચિંતા વધારી દીધી છે. જંબુસરના ખેડૂતોને આ આર્થિક સંકટમાંથી ઉગારવા માટે સરકારે ગંભીરતાથી વિચાર કરવો જરૂરી છે.