Ahmedabad News : ડ્રગ્સ પેડલરનો આતંક, પોલીસ પર કાર ચડાવી કર્યો હત્યાનો પ્રયાસ...!

અમદાવાદમાં પોલીસકર્મીઓ પર કાર ચડાવી હત્યાનો પ્રયાસ કરનાર ડ્રગ્સ પેડલરની ધરપકડ કરવામાં આવી છે. આ સમગ્ર ઘટના CCTV ફૂટેજ પણ સામે આવ્યા છે. જેમાં આરોપી પોલીસકર્મીઓને કચડી નાખવાનો પ્રયાસ કરતો જોવા મળે છે. પોલીસે આરોપી પાસેથી લાખો રૂપિયાનું MD ડ્રગ્સ પણ જપ્ત કર્યું છે.

પોલીસ પર કાર ચઢાવી હત્યાનો પ્રયાસ

આ ઘટના શહેરના પોશ વિસ્તારમાં બની હતી, જ્યાં સ્પેશિયલ ઓપરેશન ગ્રુપ (SOG) ની ટીમ ડ્રગ્સ પેડલર હમજા શેખને પકડવા માટે વોચ ગોઠવીને બેઠી હતી. પોલીસને જોઇને હમજા શેખે ભાગવાનો પ્રયાસ કર્યો અને તેણે પોલીસની ગાડીને ટક્કર મારી. ત્યારબાદ, જ્યારે પોલીસકર્મીઓએ તેને રોકવાનો પ્રયાસ કર્યો ત્યારે તેણે એક પોલીસકર્મી પર કાર ચઢાવી દીધી. જોકે, સદનસીબે પોલીસકર્મી સમયસર ખસી જતાં તેમની આબાદ બચાવ થયો હતો. આ ઘટનાનો ભયાનક વીડિયો પણ સામે આવ્યો છે. જેમાં સ્પષ્ટપણે જોઈ શકાય છે કે પોલીસકર્મી કઈ રીતે જીવ બચાવી લે છે.

આરોપી હમજા શેખની ધરપકડ અને ડ્રગ્સ જપ્તી

આ હિંમતભર્યા કૃત્ય બાદ પર પોલીસે પીછો ચાલુ રાખ્યો અને આખરે હમજા શેખને ઝડપી પાડ્યો. તેની ધરપકડ બાદ પોલીસે તેની પાસે રૂપિયા 5.81 લાખની કિંમતનું મેફેડ્રોન(MD) ડ્રગ્સ જપ્ત કર્યું છે. SOG એ આ મામલે ગુનો દાખલ કરીને વધુ તપાસ હાથ ધરી છે કે આ ડ્રગ્સનો જથ્થો ક્યાંથી આવ્યો હતો અને તે કોને વેચવાનો હતો. આ ઘટનાએ ફરી એકવાર શહેરમાં ડ્રગ્સના દૂષણ અને ગુનેગારોની બેફામ હિંમતનો મુદ્દો ઉભો કર્યો છે.