Ahmedabad News : ધોલેરા એરપોર્ટ સુધી દોડશે મેટ્રો ટ્રેન, કનેક્ટિવિટી વધારવા મેટ્રો ફેઝ-3ને ટૂંક સમયમાં મળશે મંજૂરી

અમદાવાદ અને આસપાસના વિસ્તારોમાં મેટ્રો રેલ સેવાના વિસ્તરણને લઈને મોટા સમાચાર સામે આવ્યા છે. ધોલેરા સ્પેશિયલ ઇન્વેસ્ટમેન્ટ રીજન (SIR) અને ત્યાં બની રહેલા ઈન્ટરનેશનલ એરપોર્ટને સીધી કનેક્ટિવિટી આપવા માટે હવે ધોલેરા સુધી મેટ્રો ટ્રેન દોડાવવાનું આયોજન કરવામાં આવ્યું છે. રાજ્ય સરકાર દ્વારા મેટ્રો ફેઝ-3 (Phase-3) પ્રોજેક્ટને આગામી દિવસોમાં સત્તાવાર મંજૂરી આપવામાં આવે તેવી પૂરી શક્યતા છે, જેનાથી ભવિષ્યમાં મુસાફરોની સુવિધામાં અનેકગણો વધારો થશે.

થલતેજથી ગોધાવી અને SP રિંગ રોડ થઈને બનશે નવો રૂટ

નવા પ્રસ્તાવિત મેટ્રો રૂટના પ્લાનિંગ મુજબ, આ લાઇન અમદાવાદના પશ્ચિમ વિસ્તારમાં આવેલા થલતેજથી શરૂ થશે. ત્યાંથી આગળ વધીને ગોધાવી અને સરદાર પટેલ (SP) રિંગ રોડ થઈને આ રૂટ ધોલેરા તરફ આગળ વધશે. આ રૂટના નિર્માણથી માત્ર ધોલેરા જ નહીં, પરંતુ અમદાવાદ શહેરના બહારના રિંગ રોડ અને આસપાસના ગ્રામ્ય વિસ્તારોના લોકોને પણ ઝડપી અને આધુનિક પરિવહનનો લાભ મળશે.

60 કિલોમીટર લાંબા રૂટ પર બનશે 41 સ્ટેશન

મેટ્રો ફેઝ-3 અંતર્ગત હાથ ધરાનારા આ મહાકાય પ્રોજેક્ટની લંબાઈ આશરે 60 કિલોમીટર જેટલી રહેશે. આ સમગ્ર 60 કિમી લાંબા રૂટ પર નાના-મોટા મળીને કુલ 41 જેટલાં મેટ્રો સ્ટેશનો બનાવવાનું આયોજન છે. આ વિશાળ નેટવર્ક તૈયાર થવાથી અમદાવાદથી ધોલેરા એરપોર્ટ સુધી પહોંચવું ખૂબ જ સરળ, આરામદાયક અને સમયની બચત કરનારું બની રહેશે.

આ પણ વાંચો : Ahmedabad News : રાજ્યમાં એનાલોગ પનીર, ચીઝ અને બટર મુદ્દે તવાઈ, ત્રીજા દિવસે પણ FDCAની સતત તપાસ