Ahmedabad: કાગડાપીઠમાં સામાન્ય બાબતે યુવકની હત્યા, 4 આરોપીઓને પોલીસે ઝડપ્યા

અમદાવાદ શહેરના કાગડાપીઠ વિસ્તારમાં ડીજેમાં નાચતા માત્ર હાથ અડી જવાથી થયેલી તકરારમાં એક યુવકની હત્યા કરવામાં આવી છે. જે ગુનામાં પોલીસે 4 આરોપીઓની ધરપકડ કરી છે. મહત્વનું છે કે સામાન્ય બોલાચાલીમાં યુવકને હથિયારના ઉપરાછાપરી ઘા મારી હત્યા કરવામાં આવતા લગ્નનો પ્રસંગ માતમમાં ફેરવાયો હતો.ચારેય આરોપીઓ પોતાના રહેણાંક મકાન છોડી ફરાર થયા હતા કાગડાપીઠ પોલીસે 4 આરોપી ભરત ઉર્ફે ભલી રાઠોડ, અમિત ઉર્ફે ખાધું સિંધવ, જયેશ ઉર્ફે જગો રાઠોડ અને જીગ્નેશ ઉર્ફે જીગો સિંધવની ધરપકડ કરી છે. આ તમામ આરોપીઓની ધરપકડ હત્યાના ગુનામાં કરવામાં આવી છે. ગઈકાલે મજૂર ગામ રોડ પર આવેલા ડુંગર મોતીની ચાલી પાસે મહેન્દ્ર ઉર્ફે કરણ સોલંકીની તીક્ષ્ણ હથિયારના ઘા મારી હત્યા કરવામાં આવી હતી. હત્યાને અંજામ આપી તમામ આરોપીઓ પોતાના રહેણાંક મકાન છોડી ફરાર થયા હતા. જોકે પોલીસે રાત્રે કોમ્બિંગ ચલાવી તમામ આરોપીઓને ઝડપી લીધા છે. મહેન્દ્રને તિક્ષ્ણ હથિયારના ઉપરાછાપરી ઘા માર્યા લગ્નમાં વાગતા ડીજેમાં નાચી રહેલા મહેન્દ્ર સોલંકીનો હાથ હત્યાના ગુનામાં ઝડપાયેલા આરોપી જીગ્નેશ જીગા અને અમિતને લાગી જતા બંને વચ્ચે બોલાચાલી થઈ હતી, જે બાદ તમામ આરોપીઓએ ભેગા મળી મહેન્દ્રને તિક્ષ્ણ હથિયારના ઉપરાછાપરી ઘા માર્યા હતા. જેમાં મહેન્દ્રનું મૃત્યુ નીપજતા પોલીસે હત્યાનો ગુનો દાખલ કરી આરોપીઓની ધરપકડ કરી છે. જોકે આરોપીનો ગુનાહિત ઈતિહાસ તપાસતા આરોપીઓ સામાન્ય ગુનાખોરીમાં અગાઉ સંડોવાયેલા હોવાનું પણ સામે આવ્યું છે. પોલીસે આ મામલે વધુ તપાસ શરૂ કરી કાગડાપીઠમાં થયેલી હત્યાના ગુનામાં મૃતક મહેન્દ્ર પણ ગુનાહિત ઈતિહાસ ધરાવી રહ્યો હોવાનું સામે આવ્યું છે. જોકે હત્યાના ગુનામાં સંડોવાયેલા આરોપીઓ માત્ર ડીજેમાં નાચવાની તકરારમાં જ હત્યા કરી છે કે અન્ય કોઈ કારણોસર તે અંગે પણ પોલીસે વધુ તપાસ શરૂ કરી છે.