Ahmedabadમાં શિક્ષક દિને શ્રેષ્ઠ ગુરુજનોનું બહુમાન, મેયર હિતેશ બારોટના હસ્તે 27 ઉત્કૃષ્ટ શિક્ષકોને કરાયા સન્માનિત

અમદાવાદ શહેરમાં આજે શિક્ષક દિવસની ઉજવણીના ભાગરૂપે ‘શ્રેષ્ઠ શિક્ષક પારિતોષિક વિતરણ કાર્યક્રમ’નું ભવ્ય આયોજન કરવામાં આવ્યું હતું. આ પ્રસંગે શૈક્ષણિક ક્ષેત્રે ઉત્કૃષ્ટ અને પ્રશંસનીય પ્રદાન આપનાર AMC સ્કૂલ બોર્ડ તેમજ જિલ્લા પંચાયત શાળાના શિક્ષકોને બિરદાવવામાં આવ્યા હતા. અમદાવાદના મેયર હિતેશ બારોટના વરદ હસ્તે શ્રેષ્ઠ શિક્ષકોને પારિતોષિક અને એવોર્ડ એનાયત કરીને સન્માનિત કરવામાં આવ્યા હતા. ગુરુજનોના આ સન્માન સમારોહમાં શિક્ષણ જગત સાથે જોડાયેલા અગ્રણીઓ અને મહાનુભાવો ઉત્સાહભેર સહભાગી થયા હતા.

27 શિક્ષકોને વિશેષ સન્માન, જિલ્લા અને તાલુકા કક્ષાના શિક્ષકો પણ પુરસ્કૃત

આ કાર્યક્રમ દરમિયાન શૈક્ષણિક ક્ષેત્રે વિશેષ અને પ્રેરણાદાયી કામગીરી બદલ કુલ 27 શિક્ષકોને એવોર્ડ આપીને પ્રોત્સાહિત કરવામાં આવ્યા હતા. જેમાં જિલ્લા કક્ષાએ ઉત્કૃષ્ટ યોગદાન આપનાર ૩ શિક્ષકો અને તાલુકા કક્ષાએ શ્રેષ્ઠ કામગીરી કરનાર ૪ શિક્ષકોનો પણ ખાસ સમાવેશ થાય છે. આ ઉપરાંત AMC સ્કૂલ બોર્ડ હસ્તકની પ્રાથમિક શાળાઓમાં શ્રેષ્ઠ પરિણામ અને નવીન શૈક્ષણિક પ્રવૃત્તિઓમાં અગ્રેસર રહેલા શિક્ષકોનું પણ સન્માનપત્ર અને સ્મૃતિચિહ્ન આપીને ગૌરવપૂર્વક બહુમાન કરવામાં આવ્યું હતું.

મેયર અને પદાધિકારીઓની ઉપસ્થિતિ, મોટી સંખ્યામાં શિક્ષકો જોડાયા

આ ભવ્ય સન્માન સમારોહમાં અમદાવાદના મેયર હિતેશ બારોટ, જિલ્લા પંચાયત પ્રમુખ, સ્કૂલ બોર્ડના ચેરમેન સહિતના વિવિધ પ્રશાસનિક અને રાજકીય પદાધિકારીઓ વિશેષ ઉપસ્થિત રહ્યા હતા. કાર્યક્રમમાં મોટી સંખ્યામાં શિક્ષકો, શૈક્ષણિક સંઘના પ્રતિનિધિઓ અને શિક્ષણપ્રેમીઓ જોડાઈને પ્રોત્સાહન પૂરું પાડ્યું હતું. ઉપસ્થિત મહાનુભાવોએ શિક્ષકોના રાષ્ટ્રનિર્માણ અને ભાવિ પેઢીના ઘડતરમાં રહેલા અમૂલ્ય યોગદાનને બિરદાવીને અભિનંદન પાઠવ્યા હતા.

આ પણ વાંચો : Suratના સચિન GIDCમાં કરંટ લાગતા યુવકનું દર્દનાક મોત, મિલમાં સિલાઈ મશીન ખસેડતી વખતે ઘટેલી ઘટના CCTVમાં કેદ