Vadodara: મકરપુરા GIDC માંથી મળી બિનવારસી કાર, યુવકને માર મારી તોડફોડ

વડોદરાની મકરપુરા GIDC વિસ્તારમાં એકાંત જગ્યા પરથી એક બિનવારસી કાર મળી આવતા ચકચાર મચી ગઈ છે. સ્થાનિકોએ આ કાર લાંબા સમયથી બિનવારસી હાલતમાં જોતાં તાત્કાલિક પોલીસને જાણ કરી હતી.

મકરપુરામાં મળી બિનવારસી કાર

પોલીસને જાણ થતા એસીપી પ્રણવ કટારીયા સહિતના ઉચ્ચ અધિકારીઓ ઘટનાસ્થળે દોડી આવ્યા હતા. પોલીસની ટીમે કારની ચકાસણી કરતા માલુમ પડ્યું હતું કે કારમાં અજાણ્યા યુવકો દ્વારા તોડફોડ કરવામાં આવી હતી, જેમાં કારના કાચ સહિતના ભાગોને નુકસાન પહોંચાડવામાં આવ્યું હતું.

કાર માલિકને માર મરાયો હોવાની આશંકા

એ.સી.પી. પ્રણવ કટારીયાએ કારની ચકાસણી કર્યા બાદ તેના નંબરના આધારે માલિકની તપાસ શરૂ કરાવી હતી. પોલીસની પ્રાથમિક પૂછપરછમાં બહાર આવ્યું છે કે કારનો ચાલક મકરપુરા GIDC કોલોનીનો રહેવાસી છે. વધુ તપાસમાં પોલીસને જાણવા મળ્યું કે કાર ચાલકને અજાણ્યા ચાર ઇસમોએ માર માર્યો હતો અને ત્યારબાદ કારને આ જગ્યા પર બિનવારસી હાલતમાં મૂકીને ફરાર થઇ ગયા હતા. આ બનાવ પાછળનું ચોક્કસ કારણ શું છે અને માર મારનાર ઇસમો કોણ છે તે જાણવા માટે પોલીસે શોધખોળ હાથ ધરી છે. હાલ પોલીસે કાર કબ્જે કરીને સમગ્ર ઘટનાની ઊંડાણપૂર્વક તપાસ શરૂ કરી છે.