Vadodara News : સાવલીમાં દીપડાનો આતંક! પરથમપુરા ગામમાં હુમલા બાદ ગ્રામજનોમાં ફફડાટ, VIDEO વાયરલ

સાવલી તાલુકાના સિહોરા પાસે આવેલા પરથમપુરા ગામે છેલ્લા બે દિવસથી દીપડાની સતત સક્રિય હિલચાલ જોવા મળતાં સમગ્ર પંથકમાં ભારે ફફડાટ વ્યાપી ગયો છે. ગામની સીમમાં આવેલા કોતર વિસ્તારમાં દીપડો અવારનવાર દેખા દેતાં સ્થાનિક ગ્રામજનો ભયના ઓથાર હેઠળ જીવવા મજબૂર બન્યા છે. દિવસ-રાત દીપડાની હાજરીના કારણે લોકો પોતાના ખેતરોમાં જતાં અને રાત્રે ઘરની બહાર નીકળતાં પણ ગભરાઈ રહ્યા છે.

સ્થાનિક પર હુમલો થતાં ગ્રામજનો લાકડીઓ સાથે શોધખોળમાં ઉતર્યા

દીપડાનો આતંક ત્યારે વધુ ગંભીર બન્યો જ્યારે તેણે ગામના એક સ્થાનિક વ્યક્તિ પર અચાનક હુમલો કરી દીધો. આ ઘટનાને પગલે ગામમાં ભારે અફરાતફરી મચી ગઈ હતી. પોતાનો અને પોતાના પરિવારનો બચાવ કરવા માટે ગ્રામજનો હાથમાં લાકડીઓ અને બેટરીના અજવાળા સાથે રાત્રિના સમયે ગામમાં આંટાફેરા મારીને દીપડાની શોધખોળ કરતા જોવા મળ્યા હતા. લાકડીઓ સાથે દીપડાને શોધતા ગ્રામજનોના આ દ્રશ્યોના વીડિયો સોશિયલ મીડિયા પર ખુબ વાયરલ થઈ રહ્યા છે.

વન વિભાગ સામે તાત્કાલિક પાંજરું ગોઠવવાની આક્રોશભરી માંગ

માનવ વસવાટ સુધી પહોંચેલા દીપડાના હુમલા બાદ પરથમપુરા અને આસપાસના વિસ્તારોમાં ભારે સન્નાટો અને ભયનો માહોલ છવાયેલો છે. લોકો પોતાની અને પશુઓની સુરક્ષાને લઈને ચિંતિત બન્યા છે. કોઈ મોટી દુર્ઘટના કે જાનહાનિ સર્જાય તે પહેલાં વન વિભાગ દ્વારા તાત્કાલિક અસરથી દીપડાની હિલચાલ વાળા વિસ્તારમાં પાંજરું ગોઠવીને તેને વહેલી તકે પકડી પાડવામાં આવે તેવી ગ્રામજનોએ એકસૂરે આક્રોશભરી માંગ કરી છે.

આ પણ વાંચો : Rajkotમાં મહિલાનો ‘U-Turn’ ભારે પડ્યો! એક્ટિવા સીધી દુકાનમાં ઘૂસી, CCTV સામે આવ્યું