Vadodaraના ડેસરમાં નરાધમ પિતાએ જ માસૂમ દીકરી પર આચર્યું દુષ્કર્મ, માતાએ નોંધાવી ફરિયાદ

વડોદરા જિલ્લાના ડેસર તાલુકામાંથી માનવતાને કલંકિત કરતી અને પિતા-પુત્રીના પવિત્ર સંબંધોને શર્મસાર કરતી એક અત્યંત ચોંકાવનારી તેમજ હૃદયદ્રાવક ઘટના પ્રકાશમાં આવી છે. અહીં એક પાપી પિતાએ તમામ મર્યાદાઓ ઓળંગીને પોતાની જ 13 વર્ષની સગીર વયની દીકરી પર બળજબરીપૂર્વક દુષ્કર્મ આચર્યું હોવાનો ગંભીર આક્ષેપ લાગ્યો છે. આ નરાધમ પિતાએ પોતાના જ ઘરમાં દીકરીની લાચારીનો ફાયદો ઉઠાવી આ પાશવી કૃત્ય આચર્યું હતું. આ ઘટનાની જાણ જ્યારે સગીરાની માતાને થઈ ત્યારે પરિવાર સહિત સમગ્ર પંથકમાં અરેરાટી વ્યાપી ગઈ હતી.

પોક્સો અને BNS હેઠળ ગુનો દાખલ

આ શરમજનક અને ગંભીર મામલે પીડિત સગીરાની માતાએ હિંમત દાખવીને તાત્કાલિક ડેસર પોલીસ સ્ટેશનનો સંપર્ક સાધ્યો હતો અને નરાધમ પતિ વિરૂદ્ધ સત્તાવાર પોલીસ ફરિયાદ નોંધાવી હતી. માતાની આ ફરિયાદના આધારે ડેસર પોલીસે નરાધમ પિતા સામે ભારતીય ન્યાય સંહિતા (BNS) ની ગંભીર કલમો તેમજ સગીરોની સુરક્ષા માટેના કડક કાયદા એવા પોક્સો (POCSO) એક્ટની કલમ 3(એ), 4, 5(એન) અને 6 હેઠળ ગુનો દાખલ કરીને કાયદેસરની કાર્યવાહી હાથ ધરી છે.

ગુનો નોંધાતા જ આરોપી પિતા ફરાર

ડેસર પોલીસ મથકમાં પોતાની સામે ગંભીર કલમો હેઠળ ગુનો નોંધાયો હોવાની ગંધ આવી જતાં જ નરાધમ પિતા બચવા માટે ઘર છોડીને ક્યાંક ભાગી છૂટ્યો છે. હાલમાં આ આરોપી પિતા ફરાર હોવાનું સામે આવ્યું છે. સમગ્ર મામલાની સંવેદનશીલતા અને ગંભીરતાને જોતાં ડેસર પોલીસ સ્ટેશનના PI કે.સી. પટેલ પોતે આ કેસની આગળની તપાસ ચલાવી રહ્યા છે. પોલીસે પીડિત સગીરાનું મેડિકલ ચેકઅપ કરાવવાની તજવીજ હાથ ધરી છે અને ફરાર થઈ ગયેલા નરાધમ પિતાને ઝડપી પાડવા માટે અલગ-અલગ ટીમો બનાવીને વિવિધ સ્થળોએ દરોડા શરૂ કર્યા છે.

ગુજરાતના વધુ સમાચાર વાંચવા માટે ક્લિક કરો