Una: સીમર દરિયામાંથી વિદેશી દારૂનો મોટો જથ્થો ઝડપાયો, વલસાડની બોટમાંથી 150 પેટી દારૂ જપ્ત

ગીર-સોમનાથ જિલ્લાના ઊના તાલુકામાં આવેલ સીમરના દરિયાકાંઠેથી નવાબંદર મરીન પોલીસે એક મોટી કાર્યવાહી કરીને વિદેશી દારૂનો જંગી જથ્થો પકડી પાડ્યો છે.પ્રાપ્ત માહિતી અનુસાર, નવાબંદર મરીન પોલીસે મધ દરિયે લાંગરેલી વલસાડની એક બોટ પર દરોડો પાડીને આશરે 150 પેટીથી વધુ વિદેશી દારૂનો જથ્થો કબજે કર્યો છે.

ઉનાના દરિયામાંથી દારૂ પકડાયો

આ દારૂની કિંમત લાખો રૂપિયામાં આંકવામાં આવી રહી છે.સૂત્રો દ્વારા મળતી માહિતી મુજબ, દારૂ ભરેલી આ બોટમાં 8થી વધુ ખલાસીઓ હાજર હોવાના સમાચાર છે. જોકે, દરિયાની વચ્ચેથી સીમરના દરિયા કિનારે અન્ય બોટમાં દારૂનો આ મોટો જથ્થો લાવવામાં પોલીસને મુશ્કેલી પડી રહી છે અને હાલ પોલીસ આ જથ્થો કિનારે લાવવા માટે મથી રહી છે.

 વલસાડની બોટમાંથી દારુ ઝડપાયો

પોલીસે આ સમગ્ર દારૂનો જથ્થો કબજે કરીને વધુ તપાસ હાથ ધરી છે. આટલો મોટો દારૂનો જથ્થો ક્યાંથી લાવવામાં આવ્યો હતો અને ક્યાં લઈ જવામાં આવતો હતો તે અંગેના રહસ્યો પોલીસની ઊંડાણપૂર્વકની તપાસ બાદ જ બહાર આવશે. પોલીસે દારૂના આ સમગ્ર નેટવર્કના મૂળ સુધી પહોંચવા માટે કવાયત શરૂ કરી છે.