Talala ગીર પંથકમાં મેઘરાજાની ધમાકેદાર બેટિંગ, જેપુર-ધણેજ માર્ગ પર પાણી ફરી વળ્યા

જૂનાગઢ જિલ્લાના તાલાલા ગીર પંથકમાં આજે મેઘરાજાએ ધમાકેદાર બેટિંગ કરી હતી. સમગ્ર પંથકમાં ધોધમાર વરસાદ વરસતા રસ્તાઓ પર પાણી ફરી વળ્યા હતા અને ખેડૂતોમાં ખુશીની લહેર વ્યાપી ગઈ હતી. જેપુરથી ધણેજ ગામને જોડતા માર્ગ પર આવેલા કોઝવે પર વરસાદી પાણી ફરી વળ્યા હતા. જેના કારણે વાહનવ્યવહારને અસર થઈ હતી. પરંતુ ઘણા સમયથી ખેડૂતો આ વરસાદની રીહ જોઈ રહ્યા હતા. જેના કારણે ખેડૂતોમાં અનેરો આનંદ જોવા મળ્યો હતો.

ધણેજ ગામના વોકળામાં આવ્યા વરસાદી પુર

આ ઉપરાંત ધણેજ ગામના વોકળામાં પણ વરસાદી પાણીના પુર આવ્યા હતા. તાલાલા ગીરના જેપુર, ધણેજ, ખીરધાર, ગલીયાવડ, હરિપુર, ચિત્રવડ, બોરવાવ, સંગોડ્રા અને ચિત્રોડ જેવા અનેક ગામોમાં ભારે વરસાદ નોંધાયો હતો. લાંબા સમયથી વરસાદની રાહ જોઈ રહેલા ખેડૂતો માટે આ વરસાદ આશીર્વાદરૂપ સાબિત થયો હતો. ખેતરમાં વાવેલા પાકને વરસાદી પાણી મળતા ખેડૂતોમાં સારા પાક માટે આશા બંધાઈ હતી.

જેપુર, ધણેજ, ખીરધાર, ગલીયાવડમાં વરસાદ

ચોમાસાના પાકને પૂરતું પાણી ન મળવાથી ખેડૂતો ચિંતિત હતા. પરંતુ આ વરસાદથી પાકને જીવનદાન મળ્યું છે. મગફળી, કપાસ અને અન્ય પાકોને આ વરસાદથી મોટો ફાયદો થશે. વરસાદના આગમનથી વાતાવરણમાં ઠંડક પણ પ્રસરી ગઈ હતી. સમગ્ર પંથકમાં સાર્વત્રીક વરસાદ વરસતા લોકોને ગરમીથી રાહત અનુભવાઈ હતી.