Surendranagar: દસાડા તાલુકાના મોટા ઉભડા ગામે બંધ મકાનમાં હાથફેરો કરનાર બે તસ્કર પકડાયા

દસાડાના મોટા ઉભડા ગામે બંધ રહેણાક મકાનમાં તસ્કરોએ કરતબ અજમાવ્યાની પાટડી પોલીસ મથકે ફરિયાદ નોંધાઈ હતી. જેમાં એલસીબી ટીમે 2 શખ્સોને માલવણ હાઈવે પરથી ઝડપી લીધા છે.

દસાડા તાલુકાના મોટા ઉભડા ગામે રહેતા 27 વર્ષીય સ્મીતભાઈ દીલીપભાઈ પટેલ હાલ તાપી જિલ્લાના વ્યારા ગામે રહે છે. તેઓનું મોટા ઉભડા ગામે રહેણાક મકાન આવેલુ છે. તા. 7-9ના રોજ રાત્રે તેમના ઘર ચોરી થયાની જાણ તેઓને થઈ હતી. આથી તેઓએ જઈ તપાસ કરતા ઘરના તાળા તુટેલા અને લોખંડની તીજોરી ખુલ્લી હતી. જયારે ઘરનો સામાન અસ્તવ્યસ્ત પડયો હતો.

ઘરમાં તપાસ કરતા તસ્કરો સોનાની રૂદ્રાક્ષની માળા, રોકડા મળી રૂપીયા 79,000ની ચોરી કરી લઈ ગયા હતા. આ અંગે સ્મીતભાઈએ પાટડી પોલીસ મથકે અજાણ્યા શખ્સો સામે ફરિયાદ નોંધાવી હતી. આ બનાવમાં એલસીબી પીઆઈ જે.જે.જાડેજાની સુચનાથી માલવણ હાઈવે પર પેટ્રોલીંગ કરી રહેલા સ્ટાફના દશરથભાઈ સહિતનાઓને સેડલાના 2 શખ્સોએ આ ચોરીને અંજામ આપ્યો હોવાની માહીતી મળી હતી. જેમાં સેડલાના સાજીદ ઉર્ફે શાહરૂખ જમીયતખાન મલેક સીરાજ નસીબખાન મલેકને રૂપીયા 50 હજારનું બાઈક અને રોકડા રૂપીયા 7 સહિત કુલ રૂપીયા 57 હજારના મુદ્દામાલ સાથે ઝડપી લઈ પાટડી પોલીસના હવાલે કર્યા છે.