Surendranagar: ઝાલાવાડ-અમદાવાદ જિલ્લા ગ્રામ્યમાં આજથી દીકરીઓનાં વ્રતનો આરંભ

હિન્દુ શાસ્ત્ર મુજબ આજથી દિકરીઓ માટેના વ્રતનો આરંભ થઈ રહ્યો છે. જેમાં નાની બાળાઓના મોળાકત વ્રત આજે 6થી 10 જુલાઈ સુધી અને મોટી દિકરીઓના જયા પાર્વતી વ્રત 8 થી 12 જુલાઈ સુધી ચાલશે. પાંચ દિવસના વ્રત અગાઉ દિકરીઓ જવારાનું વાવેતર કરે છે. અને વ્રતના અંતીમ દિવસે જાગરણ બાદ જવારા જળમાં પધરાવવામાં આવે છે. વ્રતને લઈને જિલ્લામાં કાજુ-બદામ સહિતના સુકામેવા અને ફળની ખરીદી ખુલી છે.

દેવાધીદેવ મહાદેવ શંકરને પતિ તરીકે પામવા માટે પાર્વતી માતાએ અને મર્યાદાપુરૂષોત્તમ રામની જીવન સંગીની બનવા માટે સીતામાતાએ વ્રત કર્યા હતા. આથી આ વ્રતને જયા-પાર્વતી વ્રત કહેવાય છે. ઝાલાવાડમાં આજે વ્રતનો આરંભ થઈ રહ્યો છે. જેમાં તા. 6 થી 10 જુલાઈ સુધી નાની બાળાઓના મોળાકત વ્રત શરૂ થઈ રહ્યા છે. 5 દિવસ આ દિકરીઓ મીઠા વગરનું જ જમે છે. જેમાં પ્રથમ દિવસે જવારાનું વાવેતર કરાયા બાદ દરરોજ તેની પુજા થાય છે. અને પુનમના દિવસે રાત્રે નાની દિકરીઓ 12 કલાક સુધીનું જાગરણ કરે છે. બીજી તરફ મોટી દિકરીઓ 5 દિવસના જયા પાર્વતી વ્રત કરે છે. જેમાં ફરાળ સાથે દિકરો ઉપવાસ અને એકટાણા કરે છે. આ વ્રત તા. 8 જુલાઈને અષાઢ માસની તેરસથી 12 જુલાઈ સુધી ચાલશે. જેમાં અંતીમ દિવસે મોટી દિકરીઓ આખી રાતનું જાગરણ કરે છે. કુંવારીકાઓ સારા પતીની આશાએ અને પરીણીતા અખંડ સૌભાગ્ય માટે આ વ્રત કરે છે. જેમાં શીવ-પાર્વતીજીને કુમકુમ, બીલીપત્ર, અષ્ટગંધ, કસ્તુરી, કેળાનો પ્રસાદ ધરાવવામાં આવે છે. આ વ્રતમાં પાંચ દિવસ સુધી મીઠા વગરનું ભોજન અને ફળ ખાઈને શિવજીની આરાધના કરવામાં આવે છે. પાંચમા દિવસે આખી રાતનું જાગરણ કરીને વહેલી સવારે શીવપુજા બાદ જ ભોજન લેવાય છે. ઝાલાવાડમાં વ્રતના આરંભથી જ તહેવારોની મૌસમ શરૂ થાય છે. જેમાં આગામી દિવસોમાં રક્ષાબંધન, સાતમ-આઠમ, નવરાત્રી અને ત્યારબાદ દિવાળી સુધી તહેવારોની સીઝન ચાલશે. જિલ્લામાં દિકરીઓના વ્રતને લઈને કાજુ-બદામ સહિતના સુકા-મેવા અને ફળની ખરીદી ખુલી છે.