Suratમાં ભારે વરસાદ વચ્ચે કરંટ લાગતા 19 વર્ષના યુવકનું કરુણ મોત

સુરતના ઉધના વિસ્તારમાં આજે ભારે વરસાદ વચ્ચે એક દુઃખદ ઘટના બની છે. રેવાનગર વિસ્તારમાં એક 19 વર્ષીય યુવકનું વીજ કરંટ લાગવાથી કરુણ મોત થયું છે. આ ઘટનાથી સમગ્ર વિસ્તારમાં શોકનું મોજું ફરી વળ્યું છે. મૃતક યુવકનું નામ નિમેષ પઢિયાર છે. આ ઘટના બપોરના સમયે બની હતી. જ્યારે શહેરમાં ભારે વરસાદ વરસી રહ્યો હતો. નિમેષ એક કારખાનામાંથી માલ ઉતારી રહ્યો હતો. તે જ સમયે વીજળીના તારના સંપર્કમાં આવતા તેને જોરદાર કરંટ લાગ્યો હતો.

ભારે વરસાદ વચ્ચે ઉધના રેવાનગરમાં સર્જાઈ દુર્ઘટના

વીજ કરંટ એટલો શક્તિશાળી હતો કે નિમેષનું ઘટનાસ્થળે જ પ્રાણપંખેરું ઊડી ગયું. આ દુર્ઘટનાની જાણ થતાં જ આસપાસના લોકો તાત્કાલિક સ્થળ પર એકઠા થઈ ગયા હતા. જોકે ત્યાં સુધીમાં ઘણું મોડું થઈ ગયું હતું. આ ઘટના બાદ નિમેષના પરિવારમાં માતમ છવાઈ ગયો છે. માતા-પિતા અને સંબંધીઓ પુત્રના અકાળે અવસાનથી ચોધાર આંસુએ રડી પડ્યા હતા.

દુર્ઘટના બાદ પરિવારમાં ચોધાર આંસુએ રડી પડ્યો

ઘટનાની જાણ થતાં જ પોલીસનો કાફલો સ્થળ પર પહોંચી ગયો હતો અને કાયદેસરની કાર્યવાહી હાથ ધરી હતી. પોલીસે મૃતદેહને પોસ્ટમોર્ટમ માટે હોસ્પિટલ ખસેડ્યો છે. આ ઘટનાએ ફરી એકવાર ભારે વરસાદ દરમિયાન વીજળીના સાધનો અને ખુલ્લા વાયરોથી સાવચેત રહેવાની જરૂરિયાત પર ભાર મૂક્યો છે. આ કરુણ બનાવથી નિમેષનો પરિવાર સંપૂર્ણપણે ભાંગી પડ્યો છે.