Suratના મોટા વરાછામાં જ્વેલર્સની મોટી ઠગાઈ, લગ્નના સોનાના દાગીના બનાવી આપવાના નામે રૂ.17.14 લાખ પડાવ્યા!

સુરત શહેરના મોટા વરાછા વિસ્તારમાં વિશ્વાસઘાત અને ઠગાઈનો એક ગંભીર મામલો સામે આવ્યો છે, જ્યાં લગ્નના પ્રસંગ માટે સોનાના દાગીના બનાવી આપવાના બહાને એક પરિવાર સાથે લાખો રૂપિયાની ઠગાઈ કરવામાં આવી છે. મોટા વરાછા ખાતે ધમધમતી ‘જય આદ્યાશક્તિ જ્વેલર્સ’ના સંચાલકો દ્વારા એક યુવક પાસેથી લગ્નના દાગીના તૈયાર કરવાના હેતુસર ટુકડે-ટુકડે કુલ રૂપિયા 17,14,000 જેટલી માતબર રકમ લેવામાં આવી હતી. જોકે, નક્કી કરવામાં આવેલી મુદત વીતી જવા છતાં જ્વેલર્સના સંચાલકો દ્વારા ન તો સોનાના દાગીના બનાવી આપવામાં આવ્યા કે ન તો ગ્રાહકના નાણાં પરત કરવામાં આવ્યા હતા.

દાગીના અને પૈસા આપવા માટે આનાકાની કરતા મામલો પોલીસ મથકે પહોંચ્યો

જ્યારે પીડિત યુવકે પોતાના દાગીના અને રોકડ રકમની માંગણી કરી ત્યારે જ્વેલર્સના સંચાલકો દ્વારા સતત ટલ્લાઓ મારવામાં આવતા હતા અને અલગ-અલગ બહાના આગળ ધરીને રકમ કે દાગીના આપવા માટે ભારે આનાકાની કરવામાં આવતી હતી. લાંબી રસાકસી અને વાયદાઓ છતાં કોઈ સંતોષકારક જવાબ કે હકીકત સામે ન આવતાં આખરે આ મામલો પોલીસ મથક સુધી પહોંચ્યો હતો. ગ્રાહક સાથે થયેલી આ પ્રકારની લાખો રૂપિયાની ઠગાઈને કારણે સ્થાનિક વેપારી આલમમાં પણ ભારે ચકચાર મચી ગઈ છે.

ઉત્રાણ પોલીસે ગુનો નોંધી સઘન તપાસ હાથ ધરી

આ મામલે અંતે પીડિત યુવક દ્વારા ઉત્રાણ પોલીસ સ્ટેશનમાં જય આદ્યાશક્તિ જ્વેલર્સના માલિકો વિરુદ્ધ લેખિતમાં સત્તાવાર ફરિયાદ નોંધાવવામાં આવી છે. ઉત્રાણ પોલીસે અરજદારની ફરિયાદના આધારે ગુનો નોંધીને જ્વેલર્સના સંચાલકોની શોધખોળ અને સઘન તપાસ શરૂ કરી છે. પોલીસે અન્ય કોઈ નાગરિકો સાથે પણ આ પ્રકારે છેતરપિંડી થઈ છે કે કેમ તે દિશામાં પણ તપાસના ચક્રો ગતિમાન કર્યા છે.

આ પણ વાંચો : Vav-Tharad News : યાત્રાધામ ઢીમાં ખાતે ધરણીધર ભગવાન મંદિરના દર્શનના સમયમાં મોટો ફેરફાર, ભક્તો માટે ખાસ વ્યવસ્થા!