Suratના ઐતિહાસિક ચૌટા બજારમાં ખરીદદારોનો ભારે ઘસારો, દિવાળીના દિવસે પણ બજારોમાં જબરદસ્ત ધમધમાટ

દિવાળી અને નૂતન વર્ષના પાવન પર્વ પર સુરત શહેરના બજારોમાં અદભુત રોનક જોવા મળી રહી છે. ખાસ કરીને સુરતના સૌથી લોકપ્રિય અને ઐતિહાસિક ચૌટા બજારમાં ખરીદદારોનું ઘોડાપૂર ઉમટી પડ્યું છે. દિવાળીના તહેવારના દિવસે પણ લોકો ખરીદી કરવા માટે મોટી સંખ્યામાં રસ્તાઓ પર ઉતરી આવ્યા છે, જેના કારણે ચૌટા બજાર સહિતના મુખ્ય માર્ગો પર જબરદસ્ત ધમધમાટ જોવા મળી રહ્યો છે. વસ્ત્રો, મીઠાઈઓ, ફટાકડા અને પૂજાની સામગ્રી ખરીદવા માટે લોકોની પડાપડી ચાલી રહી છે.

છેલ્લી ઘડીએ ખરીદી માટે ઉમટ્યા લોકો

તહેવારોના દિવસોમાં છેલ્લી ઘડીએ ખરીદી કરવાની પરંપરા મુજબ આજે સુરતીઓમાં ભારે ઉત્સાહ જોવા મળ્યો છે. પરિસ્થિતિ એવી સર્જાઈ હતી કે ચૌટા બજારમાં જ્યાં જુઓ ત્યાં માનવ મેદની જ નજરે પડતી હતી અને પગ મૂકવાની પણ જગ્યા ન હતી. બાળકોથી લઈને વડીલો સુધીના તમામ લોકો ઉત્સાહપૂર્વક દિવાળીની ખરીદીમાં વ્યસ્ત રહ્યા હતા. મોડે સુધી બજારો ખુલ્લા રહેવાને કારણે ગ્રાહકોએ પોતાની પસંદગીની ચીજવસ્તુઓની ખરીદી કરી હતી અને ઉત્સવના પર્વને ઉમંગભેર માણ્યો હતો.

બજારમાં ભારે ભીડને પગલે વેપારીઓમાં ખુશીની લહેર

છેલ્લા કેટલાક દિવસોથી મંદી કે સામાન્ય વેપારની ચિંતા કરી રહેલા વેપારીઓમાં આ અણધારી ભીડને કારણે ભારે ખુશીની લહેર ફેલાઈ ગઈ છે. દિવાળીના દિવસે થયેલા આ બમ્પર વેચાણને કારણે વેપારીઓના ચહેરા ખીલી ઉઠ્યા છે. ગરાકી સારી રહેવાથી વેપારીઓનો ઉત્સાહ બેવડાઈ ગયો છે અને તેઓ હવે આગામી લાભ પાંચમ તથા નવા વર્ષના ધંધાકીય મુહૂર્ત માટે પૂરજોશમાં તૈયારીઓમાં લાગી ગયા છે. સુરતની આ ગરમાગરમી અને ઉત્સવપ્રિય માહોલ સમગ્ર શહેરમાં દિવાળીની ઉજવણીને વધુ રંગીન બનાવી રહ્યો છે.

આ પણ વાંચો : Gandhinagar News : 108 ઘંટના રણકાર સાથે ગુંજી ઉઠશે મહુડીધામ, કાળી ચૌદશની વિશેષ ઉજવણી કરાઈ...