Surat News: સુરતના લસકાણામાં લૂંટેરી દુલ્હનનો આંતક

સુરતના હીરા મેનેજર સાથે ૧.૭૦ લાખ લઈ લગ્ન કરનાર લૂંટેરી દુલ્હનની ટોળકીનો પર્દફાશ ફેસબુક પર અપલોડ થયેલા ફોટોએ કર્યો હતો. બે દિવસ પહેલાં હોસ્પિટલના કામે રાજકોટ જવાનું કહીને ગયેલી આ યુવકની પત્નીએ જસદણમાં બીજા યુવક સાથે કરેલાં લગ્નના ફોટો અપલોડ બાદ લૂંટેરી દુલ્હન ગેંગ વિરુદ્ધ આ પ્રૌઢે લસકાણા પોલીસ મથકે ફરિયાદ નોંધાવી હતી. અમરેલીના ધારીના વતની અને હાલ પાસોદરામાં રહેતો ૪૩ વર્ષીય વિપુલ ટીંબડિયા હીરા પેઢીમાં મેનેજર તરીકે નોકરી કરે છે. તેમણે સોનલ સંદીપ ચૌહાણ સાથે બીજી ઓક્ટોબર- ૨૫એ અશ્વિનીકુમાર મહાદેવ મંદિરમાં સાદાઈથી લગ્ન કર્યા હતા. આ યુવતી અનાથ હોવાનું અને તેને એક ભાઈ સિવાય કોઈ નહિ હોવાનું જણાવ્યું હતું. જોકે લગ્ન વખતે આ યુવક પાસેથી વર્ચેટિયા તરીકે રહેલાં કમલેશ રામ કમાણીએ ૧.૭૦ લાખ રૂપિયા લીધા હતા.

સોનલને ઘરે કામ કરવા માટે મોકલવાનું જણાવ્યું

કમલેશ કમાણીને કારણે પોતાનાં લગ્ન થયા હોઇ વિપુલભાઇ તેની માટે આદર ધરાવતા હતા. ગત ૧૩મી માર્ચે કમલેશે પોતાના પુત્રને રાજકોટની હોસ્પિટલમાં દાખલ કર્યો હોઇ સોનલને ઘરે કામ કરવા માટે મોકલવાનું જણાવ્યું હતું. બીજા દિવસે સોનલનો ફોન બંધ થઇ ગયો હતો. રાજકોટમાં પણ અલગ અલગ સંપર્ક સ્થળે તેને શોધવાનો પ્રયાસ થયો હતો. પરંતુ કોઇ સફળતા મળી ન હતી. બે દિવસ બાદ તેમને આવેલા સંબંધીના કોલે તેમને હચમચાવી નાંખ્યા હતા. તપાસ ચાલી રહી હતી તે દરમિયાન વિપુલના મસિયાઇ અલ્પેશ સોહલિયાએ ફોન કર્યો હતો. તેમની પત્ની સોનલે રાજકોટના જસદણમાં બીજા યુવક સાથે લગ્ન કરી લીધા હોવાનું જણાવ્યું હતું તે સાથે જ સોનલના બીજા યુવક સાથેના લગ્ન વખતે પાડેલા ફોટો પણ મોકલ્યા હતા.

યુવકે આ લૂંટેરી દુલ્હનને પકડી લીધી

આ ફોટો અલ્પેશના જ મિત્ર શૈલેષ સોહલિયાએ પોતાના ફેસબુક પર મૂક્યા હતા. શૈલેષના પિતરાઇ રાજેશ પડાળિયાએ આ યુવતી સાથે જસદણ રામેશ્વર મંદિરમાં લગ્ન કર્યા હોઇ આનંદના અવસર તરીકે શેયર કર્યા હતા.અલ્પેશભાઇ પાસેથી શૈલેષનો અને તેની પાસેથી જેની સાથે લગ્ન થયા હતા તે રાજેશભાઇનો સંપર્ક કરતાં તેણે આ યુવતી સાથે કમલેશ કમાણીએ લગ્ન કરાવ્યા હતા. લગ્ન પેટે કમલેશ અને ટોળકીએ ૧.૮૦ લાખ રૂપિયા લીધા હતા. જોકે પોતે લૂંટેરી દુલ્હનનો શિકાર બન્યાનું જાણ્યા બાદ આ યુવકે આ લૂંટેરી દુલ્હનને પકડી લઇ જસદણ પોલીસને હવાલે કરી હતી. તે સાથે જ વિપુલભાઇએ લસકાણા પોલીસ મથકે ફરિયાદ નોંધાવતાં તેને કબજો લેવા સરત પોલીસ જસદણ રવાના થઇ હતી.